Nazarbayif qazaqistan ‏- xitay hemkarliqi heqqide toxtaldi

Xitaygha qaratqan ziyaritini dawamlashturuwatqan qazaqsitan prézidénti nursultan, peyshenbe küni xitay xelq qurultiyi da'imiy komitétining re'isi wu banggo bilen körüshüp, xitay-qazaqistan parlaméntliri otturisidiki hemkarliqini téximu kücheytishke chaqirdi.

Xitay xelq qurultiyining qazaqistan parlaménti bilen her tereplime hemkarliqini kücheytidighanliqini tekitligen xitay xelq qurultiyi da'imiy komitétining re'isi wu banggo, ikki terepning b d t , shangxey hemkarliq teshkilati pa'aliyetliri da'irisi ichide bir-biri bilen yéqindin hemkarlishiwatqanliqini eskertti. Wu banggo shundaqla teywen mesilisi, tibet mesilisi hemde sherqiy türkistan küchlirige qarshi turushta qazaqistanning xitaygha qiliwatqan yardimige rehmet éytti.

Prézidént na'azarbayif bergen bayanatida, bu qétimqi xitay ziyariti jeryanida, xitay bilen qazaqistan munasiwetlirini téximu tereqqi qildurush üchün keng da'irilik kélishimlerning imzalan'ghanliqini bildürüp, 20‏- dékabir küni 21‏ - esirde xitay-qazaqistan istratégiyilik hemkarliq " kélishimini ikki dölet munasiwetlirining yölünishini belgileydighan muhim bir höjjet dep körsetti.

Charshenbe küni, qazaqistan we xitay otturisida imzlan'ghan kélishimlerde ikki dölet otturisida néfit we teb'iy gaz sahesidiki hemkarliqni kücheytish, ikki dölet otturisidiki tijaret hejmini 2010‏- yilida 10 milyard dollargha we 1215‏- yilida 15 milyard dollargha yetküzüsh, térrorchiliq, bölgünchilik we diniy radikal küchlerge qarshi ikki dölet otturisida mewjut hemkarliqini téximu kücheytish qatarliq mesililer tekitlen'gen.

Prézidént nur sultan nazarbayif besh kün dawamlishidighan bu qétimqi xitay sepiri jeryanida, xongkong we makaw qatarliq rayonlarnimu ziyaret qilidu. (Qanat)