Xitay kommunistik partiyisi 16- nöwetlik 7- omumyighini béyjingda échildi

Xitay kompartiyisi 17- qurultiyigha teyyarliq körüsh üchün, xitay kompartiyisining bir qisim yuqiri derijilik emeldarliri, 9- öktebir seyshenbe küni béyjinggha yighilip, xitay merkizi komitétining 16- nöwetlik 7- omumyighinini bashliwetti.

Melum bolushiche, xitay merkizi komitétining 300din artuq ezasi qatnashqan bu yighinda kéler hepte échilidighan xitay kompartiyisi 17- qurultiyining yétekchi idiyisi, partiye nizamnamisi muzakire qilip békitilidiken hemde xitay re'isi xu jintaw otturigha qoyghan ilim-pen tereqqiyati közqarishini partiye yéngi nizamnamisige kirgüzüsh ishlirini bir yaqiliq qilinidiken.

Bu nöwetlik yighinigha xitay kompartiyisi merkizi komitétining barliq ezaliri we kandidat ezaliridin bashqa yene 125 neper adem chettin qatnashqan. Emma, xitay merkizi komitétining 16- nöwetlik 7- omumyighinigha, siyasiy byuro da'imiy hey'iti xu'ang jü ( ölüp ketken), déngiz armiye qomandani jang dingfa, siyasiy byuro da'imiy hey'iti chén lyangyü qatarliqlarni oz ichige alghan bir qisim kishiler qatnashmighan. Emma, diqqetni alahide tartidighan yéri xitayning maliye ministiri jin rénchingmu bu yighin'gha qatnashmighan.

Bu nöwetlik 7- omumyighinining échilish waqti bu yil 28- awghustta échilghan xitay kommunistik partiyisi siyasiy byurosining yighinida békitilgen idi. Halbuki bügünki bu yighin bir xil mexpiy yosunda élip bérilghachqa, yighin tepsilati heqqide téxi yéterlik melumat bérilmidi.

Xitay kompartiyisining omumiy qurultiyi her besh yilda bir qétim échilidighan bolup, bu nöwet échilidighan 17- qurultiyi, bu yil 15- öktebir béyjingda échilidu. (Jüme)