Хитай рәһбәрлири тәйвәнни бир җуңго принсипини етирап қилишқа үндиди


2005.01.28

Хитай сияси мәслиһәт кеңишиниң рәиси җя чиңлин, җүмә күни тәйвән мәсилиси бойичә бейҗиңдики хәлқ сарийида чақирилған йиғинда сөз қилип, тәйвәндә һакимийәт бешидики демократийә тәрәққият партийиси мустәқиллиқтин ваз кәчсә, бейҗиң тәйвән даирилири билән сөһбәт өткүзүшни халайду, дәп көрсәтти.

Хәлқ сарийидики йиғин җаң земинниң тәйвән мәсилиси һәққидики 8 нуқтилиқ тәклипи елан қилинғанлиқиниң 10 йиллиқи мунасвиити билән чақирилған. Җя чиңлин тәйвән президенти чен шүйбйәнниң тәйвән асаси қануниға өзгәртиш киргүзүш пиланини тәнқид қилип, “тәйвән даирилири асаси қанунға өзгәртиш киргүзүш арқилиқ тәйвәнниң қанун җәһәттики мустәқиллиқини ишқа ашурмақчи,” дәп көрсәткән. Җя чиңлинниң билдүрүшичә, хитай һөкүмити бу әһвалға һәргиз тақәт қилип туралмайдикән.

Амма чен шүйбйән тәйвән асаси қанунға өзгәртиш киргүзүш пилани һөкүмәт миханизимини яхшилаш болуп, тәйвән боғузиниң һазирқи һалитини өзгәртишкә қаритилмиған, дәп ақлимақта. Җя чиңлин, " әгәр демократийә тәрәққият партийиси тәйвән мустәқиллиқ принсипидин ваз кечип, бөлгүнчилик һәрикитини тохтатса, бейҗиң тәрәп иҗабий инкас қайтурушни шундақла өз ара учрушишни халайду", дәп тәкитлигән.

Шу күни тәйвән чоң қуруқлуқ комитети баянат елан қилип, бейҗиң даирилирини җаң земинниң 8 нуқтилиқ тәклипиниң көләңгүсидин қутулуп, тәйвән боғузи икки қирғиқиниң мунасвитигә йеңи тәсәввур билән йүзлинишкә үндиди.(Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.