Xitay -teywen otturisida jasus tutush buyiche yene bir jiddiy jeng bashlandi

Birleshme agéntliqining bayan qilishiche, 10 ‏- ayning 30 ‏- küni, béyjingning 'yer shari waqit géziti' xitay hökümitining 'chégra sirtidiki jasusluq organ' ining keng kölemlik tor alaqisi arqiliq mexpiyetlik oghrilash herikitini bayqighanliqi heqqide xewer élan qildi.

Uningda éytilishiche, teywendiki bu jasusluq organ 'xakér' téxnikisini qollinip xitayning hökümet, herbiy we dölet mudapi'e sana'iti tarmaqlirining tor betlirige hujum qozghash bilen shughullan'ghan. Xewerde éytilishiche, bu jasusluq heriketni kontrol qiliwatqan li fangrung isimlik kishi teywen dölet bixeterlik idarisining moskwada turushluq kespi jasusi. Xitayning dölet bixeterlik orgini hazir uni tutush heqqide jiddiy buyruq chüshürgen we bu kishini tutmay qoymaydighanliqini jakarlighan.

B b s ning bayan qilishiche, teywen qanun palatasining ezasi ju'ang xézi ependi "xitayning teywendin mexpiyetlik oghrilash üchün orunlashturghan nahayiti chong jasusluq qoshuni bar. Xitay özi hazir "oghri oghrini tut dep wqirash" hélisini oynawatidu" dégen.

Teywen bilen chong quruqluq 1949 ‏- yili ichki urushta ikkige bölünüp ketkendin kéyin, gerche iqtisadiy munasiwet üzülgen bolsimu, emma bu ikki terep otturisida jasusluq jéngi toxtimighan idi. Hazirqi teywen prézidénti chén shüybyenning teywenning musteqil bolush yaki bolmasliqini 23 milyon teywen xelq awaz qoyup belgilesh dégen démokratik herikitini yolgha qoyghanliqi xitay kommunist hökümitini yene bir qétim jiddiyleshtürdi. (Weli)