Сәндуңда туңганлар билән хитайлар арисида тоқунуш йүз берип бир адәм өлди


2007.09.04
Share on WhatsApp
Share on WhatsApp

8 - Айниң оттурилири сәндоңниң шимав йезисида туңганлар билән хитайлар оттурисида тоқунуш йүз бәргән. Америка авази радиосиниң әһвалдин хәвәрдар хоңкоң кишилик һоқуқ тәшкилати хадимлириниң баянини нәқил кәлтүрүшичә, бу тоқунушта аз дегәндә бир адәм өлгәндин башқа йигирмә нәччә адәмниң ярилинишидәк еғир ақивәт келип чиққан.

Вәқә йүз бәргән шимав йезиси туңганларниң олтурақлашқан шаңхе наһийиси билән чегрилинидиған җай болуп , 17 - авғуст күни бир туңган яш шимав йезисидики базарда оғрилиқ қиливатқанда байқилип қелип , бир қанчә йәрлик хитайдин қаттиқ таяқ йәп яриланған. Бу туңган яшниң юртдашлири, урғучи хитайлардин өч елиш мәқситидә шимав кәнтигә барғинида тоқунуш келип чиққан икән.

Гәрчә бу тоқунушта бир адәмниң өлгәнлики мәлум болған болсиму, өлгүчиниң хитай яки туңганлиқи ениқ әмәс икән. Йәрлик амминиң билдүрүшигә қариғанда , вәқә йүз бәргән пәйттә кочилар йезилиқ һөкүмәт тәрипидин қамал қилинған һәмдә тоқунушниң чоңийип кетишиниң алдини елип җиддий тинҗитилған .

Америка бирләшмә ахбаратиниң бу һәқтә бәргән хәвиридә көрситишичә, хитай даирилири адәттә миллий тоқунушлар тоғрилиқ хәвәр елан қилмайду . Шуңа бу қетим сәндуңда йүз бәргән адәм өлүштәк еғир ақивәт келип чиққан вәқәму ахбарат йүзигә чиқмиған .

Америка авази радиосиниң хәвиридә тәкитлишичә, 2000 - йили 12 - айда шәндуңниң юңшин наһийиси хелю базирида бир чошқа гөши сатидиған дукан " һалал чошқа гөши" дегән вивискини есип тиҗарәт қилғанлиқи сәвәблик йәрлик туңганлар билән хитайлар арисида йәнә мушуниңға охшаш еғир миллий тоқунуш йүз бәргән икән. (Гүлчеһрә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.