Xitayda hazir xelq'ara xewerlerning erkin tarqitilishi cheklenmekte

Xitay hökümitining chet'el xewerlirini tarqitish toghrisidiki yéngi uqturishi

Yéqinda xitay dölet radi'o , kino we téléwiziye bash idarisi erkin dunyaning metbu'atlirini cheklesh heqqide mexsus uqturush chüshergen bolup, mezkur uqturushta " yéqindin buyan bir qisim chet'el axbarat agéntliqliri we metbu'atliri türlük yollar arqiliq xitayning herqaysi jayliridiki yerlik téléwiziye istansilirigha ' roshen siyasiy qaratmiliqi' bolghan xelq'ara xewerlerni yollimaqta , shunga herqaysi yerlik téléwiziye istansilirining xelq'ara xewerlerni öz aldigha biwaste ulap anglitishi qet'iy cheklinidu " dep körsitilgen .

Xitay döletlik radi'o , kino we téléwiziye bash idarisi teripidin chüshürülgen bu uqturushta yene " mezkur uqturushni élan qilishtiki meqset xelq'ara xewer programmilirining saghlam we tertiplik tereqqi qilishi üchün shundaqla xelq'ara xewerlerni bashqurush xizmitini téximu kücheytish üchün " dep yézilghan. Xitay döletlik radi'o , kino we téléwiziye bash idarisi élan qilghan bu uqturushta xitaydiki her qaysi derijilik radi'o ‏- téléwiziye bashqurush organlirining herzaman siyasiy, omumluq we mes'uliyet tuyghusini birinchi orun'gha qoyushi kérekliki alahide tekitlinip "her qaysi derijilik radi'o ‏- téléwiziye bashqurush organliri siyasiy sezgürlükni we siyasiy perq étish iqtidarini téximu kücheytishi kérek hemde yéteklesh nuqtisini ching igilep, bashqurush xizmitide téximu mes'uliyetchan bolushi kérek " dep körsitilgen.

Xitay döletlik radi'o , kino we téléwiziye bash idarisi teripidin tarqitilghan bu uqturush boyiche, bundin kéyin xitaydiki herqaysi derijilik téléwiziye istansiliri xelq'ara xewerlerni bérishte , choqum merkizi téléwiziye istansisi we xitay xelq'ara radi'o ‏- téléwiziye istansisi teripidin teminlen'gen xewerlernila bérishi kérek iken . Shuning bilen bir waqitta, sün'iy hemra arqiliq bérilidighan téléwiziye programmilirini öz aldigha qobul qilish we tarqitish qet'iy cheklen'gen bolup,herqaysi téléwiziye istansilirida bu heqte chong tekshürüsh élip bérilidiken hemde tüzümge xilapliq qilghuchilar qattiq bir terep qilinidiken .

Xitayda hazir chet'el tilidiki zhornallarning terjime qilinishimu cheklenmekte

Yéqinda xitaydiki axbarat neshriyat bash mehkimisining emeldarliri xitay hökümitining yéqindin buyan chet'el zhornallirining memliket ichide xitaychigha terjime qilinishini cheklewatqanliqini melum qildi . Ularning bildürüshiche , hazir xitayda, bir qisim chet'el yazghuchilirining tor betliri pütünley taqiwétilgen, yerlik metbu'at orunlirigha a'it yéngi belgilimiler békitilgen .

Amérikining nyuyork shehiride turushluq “ Béyjing bahari ” zhornilining bash tehriri xu ping ependi xitay hökümitining chet'el zhornallirining terjime qilinishini cheklewatqanliqini medeniyet sahesidiki bir xil chékinish dep körsetken .

Xitayning shi'en ölkisidiki öktichi ma shyawmin xitay hökümitining bu xil qilmishini puqralarning axbarat erkinlik höqoqini hörmet qilmighanliq dep qarimaqta .

Kanadada turushluq Uyghur ziyaliysi memet toxti ependi Uyghur élidiki uchur alaqilarning xitay xitay boyiche eng éghir kontrol qiliniwatqanliqini bildürüp, özining bu heqte xitay hökümitidin qattiq narazi ikenlikini bildürdi. (Méhriban)