Хитайда японийигә қарши намайишлар улғайди


2005.04.04
Share on WhatsApp
Share on WhatsApp

Хитайда өткән һәптидин буян башланған японийигә қарши намайишлар барғансери күчийип, намайишчилар һәтта у йәрдики японийә ширкәтлирини бузуп-чеқишқа башлиғандин кейин, японийә баш министири дүшәнбә күни хитай һөкүмитидин рәсмий йосунда хитайдики японийә ширкәтлириниң бихәтәрликини сақлашни тәләп қилди.

Баш министир җуничиру койзуми сөзидә, "мән хитай һөкүмитиниң, хитайда сода қиливатқан японийә ширкәтлири вә пуқралириниң бихәтәрликигә вә әркин сода елип беришиға капаләтлик қилишини үмид қилимән" дегән.

Йәкшәнбә күни хитайниң шенҗен шәһиридики 3 миңға йеқин хитай паалийәтчиси, японийә һөкүмитиниң бирләшкән дөләтләр тәшкилати бихәтәрлик кеңишидә мәңгүлүк һәйәт әзаси болушни тәләп қилишиға қаршилиқ билдүрүп намайиш өткүзгән. Һәтта намайиш ахири зораванлиқ түсини елип, намайишчилар у йәрдики японийә сода сарийиға һуҗум қилған.

Буниңдин сирт йәнә, чеңду шәһиридиму нәччә онлиған киши намайиш өткүзүп, "ито-якадо сода сарийи" ниң деризилирини чаққан һәмдә "японийә маллирини сетивалмайли" дәп товлашқан.

Бирләшкән дөләтләр тәшкилатиниң бихәтәрлик кеңишидики бәш мәңгүлүк һәйәтниң бири хитай болуп, хитай һөкүмити риқабәтчиси японийиниң мәңгүлүк орунға еришишини һәргиз халимайду. (Пәридә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.