خىتاي باش مىنىستىرى ۋېن جىياباۋ چارشەنبە كۈنى، خىتاي خەلق قۇرۇلتىيىنىڭ ئىچىلىشىدا قىلغان سۆزىدە، خىتايدا كوممۇنىست پارتىيىسىنىڭ رەھبەرلىكىدە " سوتسىيالىست دېموكراتىيى "نى قانات يايدۇرىدىغانلىقىنى بىلدۈردى.
ۋېن جىياباۋ سۆزىدە، بىز سىياسىي ئورگانلاردىكى ئىسلاھاتنى چوڭقۇرلاشتۇرۇپ، دېموكراتىك ئورگانلارنى كۈچەيتىپ، دېموكراتىك سايلاملارنى ئۆتكۈزىمىز" دېگەن. لېكىن ئۇ، خىتايدا دېموكراتىيىنىڭ، خىتاي كوممۇنىست پارتىيىسىنىڭ 17- قۇرۇلتىيىدا بەلگىلەنگەن پرىنسىپلار ئاساسىدا يولغا قويىدىغانلىقىنى تەكىتلىگەن.
خىتاي باش مىنىستىرى شۇنداقلا، پىلانلىق تۇغۇت سىياستىنى ئىزچىل داۋاملاشتۇرىدىغانلىقىنى بىلدۈردى. ھالبۇكى خىتاي دۆلەتلىك پىلانلىق تۇغۇت كومىتېتىنىڭ مۇئاۋىن رەئىسى جاۋ بەيگې قاتارلىق خىتاي ھۆكۈمەت خادىملىرى ئۆتكەن ھەپتە، پىلانلىق تۇغۇت سىياسىتىنىڭ خەلق قۇرۇلتىيىدا جىددىي مۇنازىرە قىلىنىۋاتقان بىر مەسىلىگە ئايلانغانلىقىنى ئەسكەرتىش ئارقىلىق، بۇ سىياسەتنىڭ ئۆزگىرىدىغانلىقىنىڭ بېشارىتىنى بەرگەن ئىدى.
ۋېن جىياباۋ، خىتاي خەلق قۇرۇلتىيىنىڭ ئىچىلىشىدا قىلغان سۆزىدە، خىتاي ئارمىيىسى ھەققىدىمۇ توختىلىپ، "خىتاي ئارمىيىسىنى تەرەققىي قىلدۇرۇش، ئارمىيىنىڭ بىخەتەرلىك تەھدىتلىرىگە قارشى تۇرۇش قابىلىيەت ۋە ئىقتىدارىنى كۈچەيتىدۇ شۇنىڭدەك ئارمىيىنىڭ خىتاينىڭ ئىگىلىك ھوقۇقىنى، بىخەتەرلىكىنى ۋە تۇپراق پۈتۈنلۈكىنى قوغداش قابىلىيىتىنى مۇستەھكەملەيدۇ" دەپ كۆرسەتكەن.
خىتاي ھۆكۈمىتى سەيشەنبە كۈنى 2008 - يىللىق ھەربىي خامچوتنى 17.6 پىرسەنت كۆپەيتكەنلىكىنى جاكارلىدى. خىتاي ھۆكۈمىتىنىڭ ھەربىي خامچوتنى كۈنسېرى كۆپەيتىشى، ياپونىيە قاتارلىق خىتايغا قوشنا دۆلەتلەرنى قاتتىق بىئارام قىلماقتا.
ئامېرىكا ھۆكۈمىتى يېقىندا، ئوقۇشماسلىقلارنىڭ ئالدىنى ئېلىش ئۈچۈن، خىتاينى ھەربىي ئىستىراتېگىيىسى ۋە نىشانلىرى توغرىسىدا ئوچۇق بولۇشقا چاقىرغان. (ئۆمەر قانات)