Хитай баш министири, хитайда демократийиниң коммунист партийиниң рәһбәрликидә қанат яйдурулидиғанлиқини билдүрди


2008.03.05

Хитай баш министири вен җиябав чаршәнбә күни, хитай хәлқ қурултийиниң ичилишида қилған сөзидә, хитайда коммунист партийисиниң рәһбәрликидә " сотсиялист демократийи "ни қанат яйдуридиғанлиқини билдүрди.

Вен җиябав сөзидә, биз сиясий органлардики ислаһатни чоңқурлаштуруп, демократик органларни күчәйтип, демократик сайламларни өткүзимиз" дегән. Лекин у, хитайда демократийиниң, хитай коммунист партийисиниң 17‏- қурултийида бәлгиләнгән принсиплар асасида йолға қойидиғанлиқини тәкитлигән.

Хитай баш министири шундақла, пиланлиқ туғут сиястини изчил давамлаштуридиғанлиқини билдүрди. Һалбуки хитай дөләтлик пиланлиқ туғут комитетиниң муавин рәиси җав бәйге қатарлиқ хитай һөкүмәт хадимлири өткән һәптә, пиланлиқ туғут сияситиниң хәлқ қурултийида җиддий муназирә қилиниватқан бир мәсилигә айланғанлиқини әскәртиш арқилиқ, бу сиясәтниң өзгиридиғанлиқиниң бешаритини бәргән иди.

Вен җиябав, хитай хәлқ қурултийиниң ичилишида қилған сөзидә, хитай армийиси һәққидиму тохтилип, "хитай армийисини тәрәққий қилдуруш, армийиниң бихәтәрлик тәһдитлиригә қарши туруш қабилийәт вә иқтидарини күчәйтиду шуниңдәк армийиниң хитайниң игилик һоқуқини, бихәтәрликини вә тупрақ пүтүнлүкини қоғдаш қабилийитини мустәһкәмләйду" дәп көрсәткән.

Хитай һөкүмити сәйшәнбә күни 2008‏ - йиллиқ һәрбий хамчотни 17.6 Пирсәнт көпәйткәнликини җакарлиди. Хитай һөкүмитиниң һәрбий хамчотни күнсери көпәйтиши, японийә қатарлиқ хитайға қошна дөләтләрни қаттиқ биарам қилмақта.

Америка һөкүмити йеқинда, оқушмаслиқларниң алдини елиш үчүн, хитайни һәрбий истиратегийиси вә нишанлири тоғрисида очуқ болушқа чақирған. (Өмәр қанат)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.