Xitayda eydiz yuqumdarlirining sani 700 minggha yetti

Xitay hökümitining mölcherlishiche 2007 ‏- yilning axirigha qeder xitayda bir yil ichide eydiz wirusi bilen yuqumlan'ghuchilarning sani 700 minggha yétidiken. Xitay sehiye ministirliqining ministiri peyshenbe küni béyjingda ötküzülgen muxbirlarni kütiwélish yighinida yuqiriqi sanliq melumatni élan qilghan bolup, uning éytishiche bu san 85 ming eydiz bimarini öz ichige alidiken.

Xitay da'iriliri buningdin ilgiri eydiz bimarliri bilen eydiz wirusini yuqturuwalghuchilar sanining 2006 ‏- yilining axiri 650 minggha yetkenlikini bildürgen idi. Bu yil 10 ‏- ayning axirigha qeder, xitayda 223 ming ademning eydiz wirusi bilen yuqumlan'ghanliqi, eydiz bimarlirining bolsa 62 mingdin ashqanliqi melum bolghan.

Xitay sehiye xadimliri, eydizdin yéngi yuqumlan'ghuchilarning texminen 45 pirsentining jinsiy munasiwettin, 42 pirsentining zeherlik chékimlikni ukul qilip urush sewebidin, 12 pirsent kishining oxshash jinsliqlar arisidiki munasiwettin meydan'gha kelgenlikini bildürdi.

Mutexessislerning éytishiche, Uyghur ili, xitay buyiche eydiz wirusi eng téz tarqiliwatqan rayon bolup, Uyghur ilidiki zeherlik chékimlik chekküchiler sanining éship kétishi bilen kishiler arisida exlaq buzulushining köpiyishi eydiz wirusining shiddet bilen tarqilishigha seweb bolmaqta iken. (Eqide)