خىتاينىڭ ئەنخۇي ئۆلكىسىدە ھەربىي ئاكادېمىيە ئوقۇغۇچىلىرى ئىسيان كۆتەردى

2007-11-30
ئېلخەت
پىكىر
Share
پرىنت

خىتاينىڭ ئەنخۇي ئۆلكىسى خېفېي شەھىرىدىكى ئازاتلىق ئارمىيە توپچى قىسىملار ئاكادېمىيىسىدە توپىلاڭ يۈز بېرىپ، ئوقۇغۇچىلار بىلەن دائىرىلەر ئوتتۇرىسىدا توقۇنۇش كېلىپ چىققان ھەمدە ئوقۇغۇچىلار، ئاكادېمىيىنىڭ ئوقۇتۇش ئەسلىھەلىرىنى، ئىشىك -دېرىزە ۋە پارتىلارنى ئۇرۇپ چاققان. خەۋەرلەردە ئەسكەرتىشىچە، توقۇنۇش جەريانىدا قان تۆكۈلۈش ۋەقەسى يۈز بەرگەن بولۇشى مۇمكىن.

رادىئومىزنىڭ ئىگىلىشىچە، توپىلاڭنىڭ يۈز بېرىشىگە توپچى قىسىملار ئاكادېمىيىسىنىڭ 4 - يىللىقىدىكى ئوقۇغۇچىلار مەكتەپ دېپلومىنىڭ ئېتىراپ قىلىنمايدىغانلىقىغا نارازى بولۇپ نامايىش قىلسا، دائىرىلەرنىڭ تەھدىتىگە ئۇچرىغانلىقى سەۋەبچى بولغان. لېكىن خېفېي شەھەرلىك ج خ ئىدارىسى ۋە ئاكادېمىيە دائىرىلىرى بۇنداق بىر ئىشتىن خەۋەرسىز ئىكەنلىكىنى بىلدۈرگەن.

بىرلەشمە ئاخبارات ئاگېنتلىقىنىڭ ئەسكەرتىشىچە، ۋەزىيەت پەيشەنبە كۈنى ئاساسەن پەسىيىپ، ئوقۇغۇچىلار جۈمە كۈنى ئوقۇش باشلىغان. خېفېي ئازاتلىق ئارمىيە توپچى قىسىملار ئاكادېمىيىسىدە يۈز بەرگەن ۋەقە، خىتاي ھەربىي- ئەدلىيە سېستىمىسىدا يېقىنقى 3 ئايدىن بېرى يۈز بەرگەن تۇنجى ۋەقە ئەمەس. بۇنىڭدىن بۇرۇن تېخى يېقىندىلا ئۇيغۇر ئاپتونوم رايونىنىڭ مەركىزى ئۈرۈمچىدە شىنجاڭ ئەدلىيە - ساقچى مەكتىپىدىكى ئۇيغۇر ئوقۇغۇچىلار بىلەن خىتاي ئوقۇغۇچىلار ئارىسىدا توقۇنۇش يۈز بېرىپ، قوراللىق ساقچىلارنىڭ ئارىلىشىشىنى كەلتۈرۈپ چىقارغان ئىدى.

رادىئومىزنىڭ ئىگىلىشىچە، ۋەقەنى قوزغىغانلار ئوقۇش پۇلىنى ئۆزى كۆتۈرىدىغان " ۋاكالىتەن تەربىيىلەش سىنىپىنىڭ ئوقۇغۇچىلىرى" ئىكەن. (ئەركىن)

پىكىرلەر (0)
Share
تولۇق بەت