Kishilik hoquqni közitish teshkilati amérika hökümitidin, xitayning kishilik hoqoqi heqqidiki teleplirini otturigha qoydi

21- Dékabir jüme küni, kishilik hoquqni közitish teshkilati amérika tashqi ishlar ministiri kandiliza raysqa xet yollap amérika hökümitidin, xitayning kishilik hoqoq xatirisini ilgiri sürüshte qandaq pilani barliqini 2008- yilliq béyjing olimpikidin burun jama'etke chüshendürüshi kéreklikini telep qildi.

Kishilik hoquqni közitish teshkilati asiya bölümining diréktori sufi richardson xanim, prézidént bushning 2008- yilliq béyjing olimpikini échish murasimigha qatnishish teklipini qobul qilghanliqi we bashqa dölet rehberlirining échilish murasimigha qatnishini, xitay hazir özi yürgüzüwatqan siyaset we qilmishlirining xelq'ara jem'iyetning testiqigha érishkenliki, dep süretleydighanliqini körsetti we "shu xildiki xata chüshenchini bérip qoymasliq üchün, amérika hökümiti choqum, xitayda izchil dawamliship kéliwatqan kishilik hoquq depsendichiliklirini xitay hökümitining aldida qandaq otturigha qoyidighanliqi heqqide jama'et aldida bayan qilish kérek" dédi.

Xitayda ötküzilidighan olimpik yighini munasiwiti bilen kishilik hoquqni közitish teshkilati, axbarat erkinliki, aqqun ishchilarning xorlinishi, olimpikke munasiwetlik qurulushlarni élip bérish üchün türküm-türkümlep mejburiy a'ile köchürüsh, qarshi pikirdikilerni jimiqturush üchün élip bériliwatqan nezerbentke élish qatarliq choqum tilgha élinish zörür bolghan töt nuqtini retke tizdi.

Kishilik hoquqni közitish teshkilati amérika hökümitini olimpik bixeterlikini qoghdash ishlirigha qaysi jehetlerde arilishidighanliqini chüshendürüshke we amérika-xitay yuqiri derijilik rehberliri uchrishishida kishilik hoquq mesilisini otturigha qoyushqa qistidi.

Richardson xanim yene, "biz amérika hökümet xadimlirining kéler yil awghusttin burun xitay hökümitidin kishilik hoquqni yaxshilash tereplerde némilerni kütidighanliqini békitip chiqishini ümid qilimiz" dédi.

2008- Yilliq béyjing olimpiki dunyaning herqaysi jayliridiki kishlik hoquq teshkilatlirining qattiq naraziliqigha uchrap kéliwatqan bolup, amérikiliq kino cholpini we kishilik hoquq pa'aliyetchisi miya farrow xanim xitayning darfurda qirghinchiliq élip bériwatqan sudan hökümitini qollap kéliwatqanliqini eyiblep, béyjing olimpikini "qirghinchiliq olimpiki" dep atap, bayqut qilish pikirini otturigha qoyghan. (Jüme)