"Һәқ ‏- һоқуқимизни вә қәдир ‏- қиммитимизни қайтуруп алимиз "

2008-02-28
Елхәт
Пикир
Share
Принт

Хитайда 10 миңдин артуқ киши тәрипидин имза қоюлған " һәқ - һоқуқимизни вә қәдир ‏- қиммитимизни қайтуруп алимиз " дегән темидики бир парчә очуқ хәтниң, хитай коммунист партийисиниң 17 ‏- нөвәтлик 2 ‏- омумий йиғини ечилиши җәрянида елан қилинидиғанлиқи пәйшәнбә күни ашкариланди.

Истансимиз игилигән мәлуматтин қариғанда, мәзкүр очуқ хәттә үч хил тәләп оттуриға қоюлған болуп, биринчи хил тәләптә " дуня кишилик һоқуқ әһдинамиси"билән" хитай асасий қануни" да қәйт қилинған пуқраларниң әң әқәллий һоқуқлиридин, пуқраларниң сөз қилиш, нәшр қилиш, йиғилиш, намайиш өткүзүш әркинликигә, болупму қануний асаста амминиң " өз ‏- ара ярдәмлишиш вә өзини қутқузуш" қа охшаш җәмийәт вә бирләшмиләрни қурушиға, интернет тор бәтлири тәсис қилишиға йол қоюш шуниңдәк инсанларни гезит вә журнал чиқириш әркинликигә игә қилиш дегәнгә охшаш тәләпләр оттуриға қоюлған.

Иккинчи хил тәләптә,әмгәк билән тәрбийиләш дегән қанунсиз түзүмни бикар қилиш, болупму түрмигә соланған бигунаһ әрздарларни әркинликкә чиқириш, мәҗбурий тәсис қилинған өгиниш гуруппилири вә роһий кесәлликләр дохтурханилирини бикар қилиш, үчинчи хил тәләптә болса, " әрзийәт низамнамиси" ға өзгәртиш киргүзүп, әрздарларни бастуруш һәрикәтлирини қәтий чәкләш, һәр қандақ шараитта әрздарларни бастуруш қилмиши " асасий қанун" һәмдә " әрзийәт низамнамиси" ға асасән қанунсииз һесаблиниду, шуңа йәрлик һөкүмәт тәрипидин елип бериливатқан мәзкүр қанунсизлиқ һәрикәтлири үстидә сүрүштүрүш елип бериш вә мәсулийити еғир болған әмәлдарларни җазалаш тәләп қилинған.

Бейҗиң олимпик тәнтәрбийә мурасиминиң йетип келиш һарписида, хитайда хәлқниң һөкүмәткә болған наразилиқ һәрикәтлири күндин - күнгә күчийиватқан болуп, бу хитай даирилири нөвәттә әң әндишә қиливатқан асаслиқ мәсилиләрниң бири һесаблиниду. (Әқидә)

Пикирләр (0)
Share
Толуқ бәт