"Heq ‏- hoquqimizni we qedir ‏- qimmitimizni qayturup alimiz "

2008-02-28
Élxet
Pikir
Share
Print

Xitayda 10 mingdin artuq kishi teripidin imza qoyulghan " heq - hoquqimizni we qedir ‏- qimmitimizni qayturup alimiz " dégen témidiki bir parche ochuq xetning, xitay kommunist partiyisining 17 ‏- nöwetlik 2 ‏- omumiy yighini échilishi jeryanida élan qilinidighanliqi peyshenbe küni ashkarilandi.

Istansimiz igiligen melumattin qarighanda, mezkür ochuq xette üch xil telep otturigha qoyulghan bolup, birinchi xil telepte " dunya kishilik hoquq ehdinamisi"bilen" xitay asasiy qanuni" da qeyt qilin'ghan puqralarning eng eqelliy hoquqliridin, puqralarning söz qilish, neshr qilish, yighilish, namayish ötküzüsh erkinlikige, bolupmu qanuniy asasta ammining " öz ‏- ara yardemlishish we özini qutquzush" qa oxshash jem'iyet we birleshmilerni qurushigha, intérnét tor betliri tesis qilishigha yol qoyush shuningdek insanlarni gézit we zhurnal chiqirish erkinlikige ige qilish dégen'ge oxshash telepler otturigha qoyulghan.

Ikkinchi xil telepte,emgek bilen terbiyilesh dégen qanunsiz tüzümni bikar qilish, bolupmu türmige solan'ghan bigunah erzdarlarni erkinlikke chiqirish, mejburiy tesis qilin'ghan öginish guruppiliri we rohiy késellikler doxturxanilirini bikar qilish, üchinchi xil telepte bolsa, " erziyet nizamnamisi" gha özgertish kirgüzüp, erzdarlarni basturush heriketlirini qet'iy cheklesh, her qandaq shara'itta erzdarlarni basturush qilmishi " asasiy qanun" hemde " erziyet nizamnamisi" gha asasen qanunsi'iz hésablinidu, shunga yerlik hökümet teripidin élip bériliwatqan mezkür qanunsizliq heriketliri üstide sürüshtürüsh élip bérish we mes'uliyiti éghir bolghan emeldarlarni jazalash telep qilin'ghan.

Béyjing olimpik tenterbiye murasimining yétip kélish harpisida, xitayda xelqning hökümetke bolghan naraziliq heriketliri kündin - kün'ge küchiyiwatqan bolup, bu xitay da'iriliri nöwette eng endishe qiliwatqan asasliq mesililerning biri hésablinidu. (Eqide)

Pikirler (0)
Share
Toluq bet