Sherqi xitayda 200 ming ademning ichimlik süyi 40 sa'etkiche üzülüp qalghan

Sherqi xitayda, yer asti su menbesi bulghinish seweblik 200 ming ademning ichimlik süyi 40 sa'etkiche üzülüp qalghan bolup, melum bolushiche, bir ximiye shirkiti bulghinishni keltürüp chiqardi dep eyiblen'gen.

Xitay metbu'atlirining melumatigha qarighanda, jyangsu ölkisining shuyang shehiride düshenbe künidin charshenbe künigiche su leshliri tarqilip kétish seweblik turuba süyi étiwitilgen we wushi shehiridimu 5 milyon ademning ichimlik suyi toxtitiwétilgen.

Xitay soda xewerliri gézitide ashkarilishiche, mezkur jaylarning ichimlik su menbiyi bolghan shinyi deryasining süyi terkibide gheyri puraq , amiyak gazi we nitrogén gazining terkibi dölet belgiligen ölchemdin éship ketken iken.

Birleshme agéntliqining 4 -iyuldiki melumatigha qarighanda, hazirgha kelgüche bulghinishning heqiqiy menbiyi tépilmighan bolsimu, emma, shuyang shehiri muhit qoghdash idarisining bashliqi xu dawlen, shinyi deryasining yuqiri éqimigha jaylashqan bir ximiye zawutini bulghinishni keltürüp chiqardi, dep eyibligen.

Jyangsu ölkisi xitay ximiye sana'itining merkizi bolup, hökömet da'iriliri bu ölkige jaylashqan ximiye zawutlirini, rayonning derya, köl we qanallirini zeherlik ximiyiwiy maddiliri bilen éghir derijide bulghidi dep eyiblenmekte.

5-Ayda jyangsu ölkisi wushi shehirige yéqin jaylashqan teyxu köli we aldinqi aydiki chawxu köli qatarliqlardiki su leshlirining köpiyip kétish hadisilirini, ximiyiwiy yundilar keltürüp chiqardi dep eyibligen idi. (Jüme)