Җеңҗо шәһиридә алий мәктәп оқуғучилири билән сақчилар арисида тоқунуш йүз бәрди

Җеңҗо шәһиридики базар башқуруш идариси, чаршәнбә күни 1000 дин артуқ кишиниң қоршави астида қалди.

Истансимизниң игилишичә, хенән өлкиси җеңҗо шәһириниң базар башқуруш хадимлири, хенән малийә институтиниң алдида яймичилиқ қилған бир қиз оқуғучини қаттиқ уруп, униң удул чишини төкүвәткән, әһвални сақчиға мәлум қилған қиз оқуғучи сақчилар тәрипидин кишәнлинип елип кетилгән вә әксичә уни уруп яриландурғучиниң җавабкарлиқи сүрүштә қилинмиған. Вәқәни өз көзи билән көргән амма шуниңдәк малийә институтидики нәччә йүзлигән оқуғучи буниңдин қаттиқ нарази болуп, базар башқуруш идариси алдида наразилиқ билдүргән.

Хенән малийә институтиниң оқуғучилири базар башқуруш идарисиниң машинилириға от қоювәткән һәмдә сақчилар билән тоқунушқан. Бу арида хитай мәтбуатлири пәйшәнбә күни вәқәниң бесиқтурулғанлиқини, базар башқуруш идарисиниң мәсуллири болуп 11 кишиниң җазаға тартилғанлиқини, буниңдин сирт 5 нәпәр аманлиқ сақлаш хадиминиң қолға елинғанлиқини хәвәр қилди.

Хитай адвокатлириниң билдүрүшичә, мәзкур вәқә базар башқуруш хадимлири вә сақчиларниң зораванлиқ билән қанун иҗра қилиш қилмишидин мәйданға кәлгән болуп, бу, хитайдики қанун иҗра қилғучиларниң сүпитиниң начарлиқидин дерәк беридикән.(Әқидә)