Xitay merkizi herbiy ishlar komitétining re'isi amérikini ziyaret qilmaqta

Xitay merkizi herbiy ishlar komitétining mu'awin re'isi go boshyang resimi bir ziyaret üchün bügün washin'gton'gha keldi.

Go boshyang 2001‏- yilidin béri amérikini ziyaret qilghan xitayning eng aliy derijilik herbiy xadimi bolup, amérika birleshme agéntliqining xewer qilishiche, go boshyang bir hepte dawamlishdighan bu sepiri jeryanida amérika mudapi'e ministiri donald ramisféld we bashqa alaqidar rehberler bilen bir qatar mesililer üstide söhbet élip baridiken hemde u yene bezi herbiy bazilarni ziyaret qilidiken.

Xitay bilen amérika otturisidiki herbiy munasiwetler, 2001‏- yilida amérikining bir jasusluq ayropilani xitay urushchi ayropilanigha urulup ketkendin kéyin, pütünley üzülgen idi. Lékin bu munasiwetler yéqinqi yillardin béri qaytidin tedriji halda tereqqiy qilishqa bashlidi.

Shinxu'a agéntliqining, xitay mudapi'e ministirliqi tashqi ishlar bölümining mu'awin mudiri chiyen lixaw ning sözlirini neqil keltürüshiche, xitay merkizi herbiy ishlar komitétining mu'awin re'isi go boshyangning bu qétimqi amérika ziyariti xitay herbiy rehberlik orginining chet bir döletke qaratqan eng muhim ziyariti hésablinidu. (Qanat)