Хитайдин чәткә қачқан җинайәтчиләр 8 милярд долларға йеқин хиянәт қилди


2006.05.23
Share on WhatsApp
Share on WhatsApp

Хитай җамаәт хәвпсизлик министирлиқи, иқтисадий җинайәтчиләрниң чәтәлләргә қечишини тохтитиш үчүн җиддий тәдбир алидиғанлиқини билдүрди. Буниңдин бир күн бурун хитай мәтбуати канада һөкүмитиниң хитайдики әң чоң әткәсчилик гуруһиниң йетәкчиси дәп әйибләнгән ләй чаңшиңни хитайға қайтуруши мумкинлиқини хәвәр қилған иди.

Сәйшәнбә күни хитай җамаәт хәвпсизлик министирлиқиниң хадими гав фең бейҗиңда мухбирларға бәргән баянатида, йеқинқи йиллардин буян 800 нәпәрдин көп иқтисадий җинайәтчиниң хитайдин чәтәлгә қечип кәткәнликини, буларниң ичидә 300 дин көпрәкиниң хитайға қайтурулғанлиқини, бу кишиләр хиянәт қилған пул миқдариниң 70 милярд йүәндин, йәни 7 милярд 7 йүз 30 милйон доллардин ашидиғанлиқини билдүрди.

Гавниң ейтишичә, иқтисадий җинайәтчиләрниң дөләттин пул қачурушиниң алдини елиш үчүн, җамаәт хәвпсизлик минситирлиқи, тәптиш комитети хитай хәлқ банкиси вә баҗ идариси билән һәмкарлиқни күчәйткән.

Ләй чаңшиң хитайдин чәтәлгә қечип кәткән әң атақлиқ иқтисадий җинайәт гумандари һесаблиниду. У нефит, машина әткәсчилики арқилиқ милярдлиған доллар пул тапқан болуп, 1999 ‏- йили аяли вә үч балиси билән бирликтә канадаға қечип берип, канада һөкүмитидин сиясий панаһлиқ тәләп қилған иди. (Қанат)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.