Xu jintaw öz yéqinlirini östürüp öz hoquqini mustehkemlimekte

Xitay prézidénti xu jintaw xitay kommunistik partiyisi 17- qurultiyidin burun öz yéqinlirini muhim orunlargha qoyush arqiliq xitay hakimiyitidiki ornini mustehkemleshke bashlighan.

Roytérs agéntliqining 31- awghusttiki melumatigha qarighanda xu jintaw hazir xitay kommunistik partiyisi merkizi komitéti da'imiy ishlar mudiriyitining mu'awin mudirliq wezipisini ötewatqan yéqini ling jixu'ani hazir xitay merkiziy komitét da'imiy ishlar mudiriyitining bash mudirliq wezipisini ötewatqan wang gangning ornigha östürmekchi iken.

Wang gang 1977- yilidin 1981- yilighiche, xitay hökümitining Uyghur élidiki partkomining bash katipliq wezipisini ötigen bolup, ichki ishlardin xewerdar zatlarning ashkarilishiche, wang gang sabiq xitay re'isi jyang zéminning adimi iken.

Özini ashkarilashni xalimighan bireylen roytérsqa: "bu bek muhim orun" dégen we shundaq qilish arqiliq xu jintawning öz siyasiy ornini mustehkemlewatqanliqini bildürgen.

Siyasiy byuro bolsa xitay kommunistik hakimiyitining merkizi bolup, qanun belgilesh, qarar élish qatarliq bir qatar nazuk we mexpiy mesililer bir terep qilinidighan orun.

Partiye merkizi komitét da'imiy ishlar mudiriyitining sabiq mudirliri hazir siyasiy byuroning kandidat ezaliri bolup bularning ichide, bash ministir wén jiyabaw we mu'awin re'is zéng chingxung qatarliqlar bar. (Jüme)