Xumdan "qul ishchi" setchilikige alaqidar on nechche ademni sotlash bashlandi

Aldinqi ayda, ishchilarni xumdanda qul qilish setchiliki pur ketkendin kiyin, bu ish pütün xitay miqyasida küchlük ghulghula we nepret qozghighan idi. Charshenbe küni, eshu xumdan "qul ishchi" setchilikige alaqidar on nechche ademni sotlash bashlandi.

Aldinqi ayda shenshi we xénen ölkiliride, yüzligen déhqan ösmürlerning aldinip xumdan we kömürkanlarda ishleshke mejburlinip qul qilin'ghanliq xewiri ashkarilan'ghandin kiyin xitay hökümet da'iriliri, qul qilish we ösmür ishchilarni ishlitish qilmishlirigha zerbe béridighanliqini jakarlighan.

Xitay téléwizorlirida , qarawullarning ishchilarni itqa talatqanliqi we urghanliqini körsetken hem azat qilin'ghan ishchilarning éghir emgek we tayaq zerbisidin oruqlap shümshiyip, yariliri yiringlap ketkenlikini ashkarilighan idi.

Roytérs agéntliqi muxbirining, shenshi ölkisi linfén sheherlik ottura sot mehkimisidiki bir xadimidin igilishiche, xumdan igisi wang bingbin, nazaretchi xéng tingxen we bezi xumdan qarawulliri ustidin sot échish bashlan'ghan.

Mezkur sotxana xadimining bildürüshiche yene, bu jinayetchilerge, qanunsiz tutup turush, mejburiy emgekke sélish we xorlash qatarliq jinayetler artilghan.

Xitay hökümet axbarat wasitilirining xewirige qarighanda, xumdan xojayini wang shu jaydiki yerlik kommunistik partiye sékritarining oghli iken.

Melum bolushiche, hazirgha qeder bu weqege chétishliq 130 adem qolgha élin'ghan we 500 din artuq ishchi qulluqtin azat qilin'ghan. (Jüme)