Хитайда хусусий мүлүк қануни йолға қоюлиши мумкин

Хитайда узундин бири муназирә қилиниватқан хусуси мүлүкни қоғдаш қануни йеқинда йолға қоюлиши мумкин. Хәвәрләргә қариғандахусуси мүлүк тоғрисидики қанун лайиһиси хитай хәлқ қурултийи қанун мақуллаш комитетиға тапшурулған.

Хитай мәтбуатиниң хәвәр қилишичә, хитай хәлқ қурултийиниң рәиси ву баңго вә қурултайниң башқа рәһбәрлири йәкшәнбә күни хусуси мөлүк қануниниң алтинҗи қетим түзүп чиқилған шәклини муһакимә қилған болуп, ахирқи шәклиниң хусуси мүлүк билән дөләт игилики мүлүк оттурисидики тәңпуңлуқни яхши сақлиғанлиқини билдүргән.

Хитай мәтбуатида чиққан хәвәрләр вә хитай хәлқ қурултийи рәһбәрлириниң мәзкур қанун лайиһиси һәққидики иҗабий сөзлири, тунҗи хусуси мулүк қануниниң йеқинда қобул қилинип, йолға қойолидиғанлиқиниң бишаритини бәрмәктә. Хәвәрләргә қариғанда, хитай хәлқ қурултийи алдимиздики март ийидики омумий йеғинида мәзкур қанунни мақуллиши мумкин.

Хитай коммунист партийиси ичидә нурғун талаш-тартишларға сәвәб болған хусуси мүлүк қануни тоғрисидики тәклип бәш йил бурун оттуриға қоюлған иди. Коммунист партийиси ичидики бәзи солчи иқтисад шунаслар, алимлар вә әмәлдарлар, бу қанун дөләтниң игилик һоқуқиниң йоқилишиға сәвәб болиду дәп, қанунға қарши чиққан. Партийә ичидики иқтсадий ислаһат тәрәпдарлири мәзкүр қанунни қоллиған иди. Һәтта коммунист партийиси ичидики талаш-тартишлар түпәйлидин компартийә рәһбәрлири март ейида бу қанун лайиһисини хәлқ қурултийиға сунуштин ваз кәчкән. Әмма авғуст ейида хусуси мүлүк һәққидә тәйярланған бәшинчи лайиһидә дөләт игилики иқтсадий түзүмниң асаслиқ бәлгилигүчси дәп бекитилгәндин кейин, қанунға қарши чиққанларниң наразилиқи пәсәйгән. (Қанат)