Xitayda xususiy mülük qanuni yolgha qoyulishi mumkin

Xitayda uzundin biri munazire qiliniwatqan xususi mülükni qoghdash qanuni yéqinda yolgha qoyulishi mumkin. Xewerlerge qarighandaxususi mülük toghrisidiki qanun layihisi xitay xelq qurultiyi qanun maqullash komitétigha tapshurulghan.

Xitay metbu'atining xewer qilishiche, xitay xelq qurultiyining re'isi wu banggo we qurultayning bashqa rehberliri yekshenbe küni xususi mölük qanunining altinji qétim tüzüp chiqilghan sheklini muhakime qilghan bolup, axirqi sheklining xususi mülük bilen dölet igiliki mülük otturisidiki tengpungluqni yaxshi saqlighanliqini bildürgen.

Xitay metbu'atida chiqqan xewerler we xitay xelq qurultiyi rehberlirining mezkur qanun layihisi heqqidiki ijabiy sözliri, tunji xususi mulük qanunining yéqinda qobul qilinip, yolgha qoyolidighanliqining bisharitini bermekte. Xewerlerge qarighanda, xitay xelq qurultiyi aldimizdiki mart iyidiki omumiy yéghinida mezkur qanunni maqullishi mumkin.

Xitay kommunist partiyisi ichide nurghun talash-tartishlargha seweb bolghan xususi mülük qanuni toghrisidiki teklip besh yil burun otturigha qoyulghan idi. Kommunist partiyisi ichidiki bezi solchi iqtisad shunaslar, alimlar we emeldarlar, bu qanun döletning igilik hoquqining yoqilishigha seweb bolidu dep, qanun'gha qarshi chiqqan. Partiye ichidiki iqtsadiy islahat terepdarliri mezkür qanunni qollighan idi. Hetta kommunist partiyisi ichidiki talash-tartishlar tüpeylidin kompartiye rehberliri mart éyida bu qanun layihisini xelq qurultiyigha sunushtin waz kechken. Emma awghust éyida xususi mülük heqqide teyyarlan'ghan beshinchi layihide dölet igiliki iqtsadiy tüzümning asasliq belgiligüchsi dep békitilgendin kéyin, qanun'gha qarshi chiqqanlarning naraziliqi peseygen. (Qanat)