Хитай билән японийә йипәк йолидики мәдәнийәт мираслирини қоғдаш келишими имзалиди

Хитайниң дөләтлик мәдәни ядикарлиқларни қоғдаш идариси билән японийә мәдәнийәт мираслири вә сәнәт тәтқиқат фонди җәмийити, уйғур аптоном райони вә гәнсу қатарлиқ йипәк йоли бойидики мәдәнийәт мираслирини қоғдаш түри бойичә келишим имзалиди.

Келишим бойичә японийә мәзкур түргә бир милйон 280 миң доллар мәбләғ селип, йипәк йоли бойидики мәдәний мирасларни қоғдайдиған 100 нәпәр кәспий хадимни йитиштүрүшкә ярдәм бериду. Хитай дөләтлик мәдәний ядикарлиқларни қоғдаш идарисидики даириләрниң әскәртишичә, бу пилан икки тәрәпниң дөләт дәриҗилик тәтқиқат иниститутлири тәрипидин елип берилидикән.

Уйғур аптоном райони ғәрб билән шәрқ арисидики қәдимий карван йолиниң әң муһим түгини. Хитай даирилири йипәк йоли бойидики миллий мәдәнийәт мираслирини қоғдашқа алаһидә әһмийәт берип келиватқанлиқини әскәртип кәлмәктә. Әмма көзәткүчиләрниң тәкитлишичә, бу хил әһмийәт бериш символ характерлик түскә игә болуп, ғәрбни ечиш истратегийиси уйғурларниң қурулуш, бағ - варан вә турмуш муһити , мәдәнийәт ядикарлиқлирини еғир дәриҗидә вәйран қилған.

Шинхуа ахбарат агентлиқи, "қәдимий карван йолидики нурғун мәдәнийәт мираслири, тәбий вә сүний амиллар тәрипидин вәйран қилиниш тәһдитигә дуч келиватқанлиқини тәкитлигән. Шинхуа ахбарат агентлиқиниң әскәртишичә, йипәк йоли мәдәнийәт мираслирини қоғдайдиған кәспий хадимлар уйғур аптоном райони, гәнсу, ниңшя, шәнши вә хенән қатарлиқ җайлардики яш вә оттура яшлиқ кәспий хадимлар арисидин таллиниду. (Әркин)