Xitay bilen yaponiye yipek yolidiki medeniyet miraslirini qoghdash kélishimi imzalidi

Xitayning döletlik medeni yadikarliqlarni qoghdash idarisi bilen yaponiye medeniyet mirasliri we sen'et tetqiqat fondi jem'iyiti, Uyghur aptonom rayoni we gensu qatarliq yipek yoli boyidiki medeniyet miraslirini qoghdash türi boyiche kélishim imzalidi.

Kélishim boyiche yaponiye mezkur türge bir milyon 280 ming dollar meblegh sélip, yipek yoli boyidiki medeniy miraslarni qoghdaydighan 100 neper kespiy xadimni yitishtürüshke yardem béridu. Xitay döletlik medeniy yadikarliqlarni qoghdash idarisidiki da'irilerning eskertishiche, bu pilan ikki terepning dölet derijilik tetqiqat inistitutliri teripidin élip bérilidiken.

Uyghur aptonom rayoni gherb bilen sherq arisidiki qedimiy karwan yolining eng muhim tügini. Xitay da'iriliri yipek yoli boyidiki milliy medeniyet miraslirini qoghdashqa alahide ehmiyet bérip kéliwatqanliqini eskertip kelmekte. Emma közetküchilerning tekitlishiche, bu xil ehmiyet bérish simwol xaraktérlik tüske ige bolup, gherbni échish istratégiyisi Uyghurlarning qurulush, bagh - waran we turmush muhiti , medeniyet yadikarliqlirini éghir derijide weyran qilghan.

Shinxu'a axbarat agéntliqi, "qedimiy karwan yolidiki nurghun medeniyet mirasliri, teb'iy we sün'iy amillar teripidin weyran qilinish tehditige duch kéliwatqanliqini tekitligen. Shinxu'a axbarat agéntliqining eskertishiche, yipek yoli medeniyet miraslirini qoghdaydighan kespiy xadimlar Uyghur aptonom rayoni, gensu, ningshya, shenshi we xénen qatarliq jaylardiki yash we ottura yashliq kespiy xadimlar arisidin tallinidu. (Erkin)