Xitay générali zörür tépilghanda amérikigha qarshi yadro qorali ishlitishni teshebbus qildi

Birleshme axbarat agéntliqining xewer qilishiche, xitayning yuqiri derijilik bir herbiy générali eger amérika teywen mesiliside jonggo bilen urush qilsa, jonggo amérikigha yadro qorallar bilen qayturme zerbe bérishi kérek, dep qaraydighanliqini bildürdi.

Xitay dölet mudapi'e uniwérsitétining ilmiy mudiri général mayor ju chingxu, " eger amérikiliqlar bashqurulidighan bombilirini we hujum qilish pozitsiyisini jonggo térritoriyisidiki nishanlargha orunlashtursa, méningche biz yadro qorallar bilen jawab bérishimiz kérek," dep körsetti. Ju chingxu bu sözlerni xongkong muxbirlirining ziyaritini qobul qilghanda sözligen. Emma juning tekitlishiche, bu sözler uning shexsiy köz qarishi bolup, hökümetning siyasitige wekillik qilmaydiken.

Xitay tashqi ishlar ministirliqi bilen dölet mudapi'e ministirliqi ju chingxuning sözige baha bérishni ret qildi. Emma ju chingxuning sözi teywen da'irilirining tenqidige uchrighan.

Teywen chong quruqluq komitétining mu'awin re'isi maykil yoy, ju chingxuning mediniy dunyadin " epu sorishini telep qildi." Héchkim yadro qorallar bala - qazasi yüz bérishni arzu qilmaydu," dep tekitligen maykil yoy, " bu xil köz qarashlar lenetlinishi kérek," dep körsetti. Ju chingxuning sözi jonggo néfit shirkitining amérika unochal shirkitini sétiwélish niyiti amérikiliqlarda guman qozghawatqan mezgilge toghra keldi.(Erkin)