Хитай генерали җу чиңхуниң сөзи америка һөкүмитиниң диққитини қозғиди
2005.07.18
Җоңго дөләт мудапиә университетиниң илмий мудири генерал майор җу чиңхуниң әгәр америка тәйвән урушиға арлашса, америка һәрбий нишанлириға ядро қораллар билән зәрбә бериш керәк, дегән сөзи америка даирилириниң диққитини қозғиди. Америка ташқи ишлар министирлиқи, җу чиңхуниң сөзи хитай һөкүмитиниң мәйданиға вәкиллик қилмаслиқини үмид қилди.
Җу чиңху өткән пәйшәнбә күни хоңкоң мәтбуатлириға баянат берип, "әгәр америкилиқлар башқурулидиған бомба вә һуҗум қилиш позисийисини җоңго территорийисигә орунлаштурса, мениңчә биз ядро қораллар билән җаваб беришимиз керәк," дәп тәкитлигән. Җу чиңху бу сөзләрни америка дөләт мудапиә министирлиқи хитайниң һәрбий һазирлиқлар әһвали тоғрисида доклат тәйярлаватқан бир чағда сөзлиди.
Америка ташқи ишлар министирлиқиниң тәкитлишичә, җу чиңхуниң сөзи " еғир мәсулийәтсизлик" кә ятидикән. Америка, җу чиңхуниң сөзи хитай һөкүмитиниң рәсми мәйданиға вәкиллик қилмаслиқини үмид қилимиз, дәп көрсәтти.
Хитай ташқи ишлар министирлиқи, җу чиңхуниң сөзи униң шәхсий көз қаришиға вәкиллик қилидиғанлиқини билдүрди. Җу чиңху шу қетимқи мухбирларни күтүвелиш йиғинида, "җоңго тәрәп шиәнниң шәрқидики пүтүн шәһәрләрниң вәйран болушиға тәйярлиқ қилип қойди, бирақ америкиму нәччә йүз шәһриниң җоңго тәрипидин вәйран қилинидиғанлиқиға тәйярлиқ қилип қоюши керәк," дәп агаһландурған. (Әркин)
Мунасивәтлик мақалилар
- Хитай генерали зөрүр тепилғанда америкиға қарши ядро қорали ишлитишни тәшәббус қилди
- явропа парламенти шәрқий асиядики дөләтләрни өзини тутувелишқа чақирди
- Мәхпий һөҗҗәт: америка хитайдики бир қатар һәрбий қурулушлардин хәвәрсиз қалған
- Хитай, һәрбий қурулушиниң асия бихәтәрликигә тәһдит селиватқанлиқини рәт қилди
- Хитай 10 йилниң ичидә башқурулидиған бомбилирини техиму көпәйтиши мумкин