Америка дөләт мәҗлис әзалири яң җйәнлини қоюп беришкә чақиридиған қарар мақуллиди


2006.04.11
Share on WhatsApp
Share on WhatsApp

Америка дөләт мәҗлисиниң кеңәш вә авам палата әзалири президент буштин хитай дөләт рәиси хуҗинтав билән бу айниң 20 - күни учрашқанда, хитай демократийә паалийәтчиси яң җйәнлини қоюп беришкә үндәшни тәләп қилди.

Хитай даирилири мәркизи америкидики җуңго 21 - әсир фонди җәмийитиниң рәиси яң җйәнлини 2002 - йили қолға алғандин кейин, тәйвәнгә җасуслуқ қилиш вә җуңго земиниға қанунсиз кириш билән әйиблигән һәмдә қамақ җазасиға һөкүм қилған. 119 Нәпәр авам палата әзасиниң президент бушқа йоллиған хетидә " биз сизниң рәис ху җинтавни яң җйәнлини қоюп бәрсә, җуңго һечнимисидин айрилип қалмайдиғанлиқиға қайил қилишиңизни үмид қилимиз " дейилгән.

Һенри хайд, барней франк, там лантос, кристофир симит, майкил капуано қатарлиқ авам палатасида зор тәсир күчкә игә затлар тәрипидин йезилған хәттә, "әксичә җуңго буниңдин, икки дөләтниң өз ‏- ара истратегийилик шериклик мунасивитидә иҗабий дәсмайигә игә болиду " дәп тәкитлигән. Президент буш яң җйәнли мәсилисини өткән йили ху җинтав билән ню йоркта көрүшкәндә оттуриға қойди. Лекин хитай ташқий ишлар министирлиқи баянатчиси лю җйәнчав сәйшәнбә күни яңҗйәнли дилосиниң җуңго қанунлири бойичә бир тәрәп қилинғанлиқини билдүргән.

Бейҗиң һөкүмити һәр қетим америка билән юқири дәриҗиликләр сөһбити елип бериштин бурун түрмидики бәзи өктичиләрни қоюп берип кәлмәктә. Улар өткән йили 3 - айда америка ташқий ишлар министири кондилиза райис бейҗиңни зиярәт қилиштин бурун уйғур кишилик һоқуқ паалийәтчиси рабийә қадирни қоюп бәргән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.