Вен җябав, японийини "тарих билән йүзлишиш" кә чақирди

Хитайда японийә дүшмәнлики юқири көтүрүливатқан бир мәзгилдә, хитай баш министири вен җябав сәйшәнбә күни японийини "тарих билән йүзлишиш" кә чақирди. Амма шу күни японийә сода министири, хитайни "қорқунчлуқ дөләт," дәп атиған.

японийә, б д т ниң хәвпсизлик кеңишигә даимий әза болуш йолида теришиватқан бир чағда, японийә армийисиниң 2 - дуня уруши мәзгилидики ишғалийәт һәрикитини бурмилаш билән әйибләнгән японийә һөкүмити, хитай милләтчилириниң японийә маллирини байқут қилиш вә хитайдики японийә нишанлириға һуҗум қилиш һәрикитигә дуч кәлмәктә иди.

японийә "юмиро шинбонә" гезитиниң хәвәр қилишичә, хитайдики икки чоң магизин японийиниң асахи пивиси билән аҗиномото йимәк - ичмәк мәһсулатлирини байқут қилған. Хитайдики бир тиҗарәтчиләр җәмийити, японийә мәһсулатлириға қаритилған байқутни кеңәйтишкә чақирған. Йеңи деһлида токйони " тарих билән мәрданиларчә йүзлишишкә" чақирған вен җябав, хәвпсизлик кеңишиниң даими әзалиқини талишиш мәсилисидә японийиниң чоңқур ойлишишини тәләп қилди. У, "асия хәлқлириниң күчлүк инкаси, японийә һөкүмитини чоңқур вә әтраплиқ ойландуруши керәк," дәп көрсәтти.

японийә хитайниң дунядики әң чоң сода шерики болуп, икки дөләтниң 2004 - йилдики сода һәҗими 178 милярд доллар иди. японийә сода министири накагава, японийә дүшмәнликиниң хитайдики японийә карханилириға көрситидиған тәсиридин әнсирәватқанлиқини билдүргән. У, хитайни "қорқунчлуқ дөләт," дәп атиди.

Хитайлар үч күнниң алдидики намайишда японийә байрақлирини көйдүргән, японийә машинилирини уруп - чаққан, хитайдики японийә ширкәтлирини нишанға алған шундақла бейҗиңдики японийә әлчиханисиниң деризисини чеқивәткән иди. японийә тәрәп хитай һөкүмитиниң әпу соришини шундақла келип чиққан иқтисадий зиянни төләп беришини тәләп қилған. Бирақ бейҗиң һөкүмити әпу соримайдиғанлиқини җакарлиди. (Әркин)