Wén jyabaw, yaponiyini "tarix bilen yüzlishish" ke chaqirdi


2005.04.12
Share on WhatsApp
Share on WhatsApp

Xitayda yaponiye düshmenliki yuqiri kötürüliwatqan bir mezgilde, xitay bash ministiri wén jyabaw seyshenbe küni yaponiyini "tarix bilen yüzlishish" ke chaqirdi. Amma shu küni yaponiye soda ministiri, xitayni "qorqunchluq dölet," dep atighan.

Yaponiye, b d t ning xewpsizlik kéngishige da'imiy eza bolush yolida térishiwatqan bir chaghda, yaponiye armiyisining 2 - dunya urushi mezgilidiki ishghaliyet herikitini burmilash bilen eyiblen'gen yaponiye hökümiti, xitay milletchilirining yaponiye mallirini bayqut qilish we xitaydiki yaponiye nishanlirigha hujum qilish herikitige duch kelmekte idi.

Yaponiye "yumiro shinbone" gézitining xewer qilishiche, xitaydiki ikki chong magizin yaponiyining asaxi piwisi bilen ajinomoto yimek - ichmek mehsulatlirini bayqut qilghan. Xitaydiki bir tijaretchiler jem'iyiti, yaponiye mehsulatlirigha qaritilghan bayqutni kéngeytishke chaqirghan. Yéngi déhlida tokyoni " tarix bilen merdanilarche yüzlishishke" chaqirghan wén jyabaw, xewpsizlik kéngishining da'imi ezaliqini talishish mesiliside yaponiyining chongqur oylishishini telep qildi. U, "asiya xelqlirining küchlük inkasi, yaponiye hökümitini chongqur we etrapliq oylandurushi kérek," dep körsetti.

Yaponiye xitayning dunyadiki eng chong soda shériki bolup, ikki döletning 2004 - yildiki soda hejimi 178 milyard dollar idi. Yaponiye soda ministiri nakagawa, yaponiye düshmenlikining xitaydiki yaponiye karxanilirigha körsitidighan tesiridin ensirewatqanliqini bildürgen. U, xitayni "qorqunchluq dölet," dep atidi.

Xitaylar üch künning aldidiki namayishda yaponiye bayraqlirini köydürgen, yaponiye mashinilirini urup - chaqqan, xitaydiki yaponiye shirketlirini nishan'gha alghan shundaqla béyjingdiki yaponiye elchixanisining dérizisini chéqiwetken idi. Yaponiye terep xitay hökümitining epu sorishini shundaqla kélip chiqqan iqtisadiy ziyanni tölep bérishini telep qilghan. Biraq béyjing hökümiti epu sorimaydighanliqini jakarlidi. (Erkin)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.