Xitay yaponiye tashqi ishlar ministirining ziyaritini bikar qildi

Yaponiye bash ministiri junichiro koyzomi talash- tartishtiki urush qurbanliri buzrukgahini yene bir qétim ziyaret qilghandin kiyin, xitay tashqi ishlar ministiri seyshenbe küni yaponiye tashqi ishlar ministiri nobutaka machimuraning béyjinggha qilidighan ziyaritini bikar qildi.

Xitay tashqi ishlar minsitirliqining bayanatchisi kung chü'en " hazirqi weziyette, bu ziyaretni qobul qilalmaymiz" dédi.

Amérika birleshme axbarat agéntliqining xewirige qarighanda, xitay, yaponiye bash ministiri koyzomining düshenbe küni urush qurbanliri buzrukgahini tawap qilghanliqigha qet'iy qarshi chiqqan. Xitay tashqi ishlar ministiri li jaw shing yaponiyining xitaydiki bash elchisini chaqirtip, koyzomining bu pa'aliyitige qattiq étiraz bildürgen. Xitay- yaponiye munasiwitidiki jiddiylik buning bilen yenimu chongqurlashqan.

Shuning bilen bir waqitta, yaponiyidiki yene 200 ge yéqin parlamént ezasi birlikte urush qurbanlar buzrukgahini tawap qildi. Bu buzrukgahqa ikki milyon besh yüz ming urush qurbanlirining roh taxtisi qoyulghan bolup, bularning ichide 2 - dunya urushidiki urush jinayetchiliri dep qaralghanlarningmu nami bar.

Tenqidchiler, mezkur buzrukgahni yaponiyining herbiy tajawuzchiliq tarixining simwoli dep qaraydu. Emma yaponiye bash minsitiri koyzomi bolsa, uning urush qurbanliri buzrukgahini tawap qilishini, aldinqi tawaplirigha oxshashla tinchliqni tileshni meqset qilghanliqini bildürüp, bashqa dölet hökümetlirini uning shexsiy ibaditige arilashmasliqqa chaqirdi. (Arzu)