Gérmaniye kishilik hoquq pa'aliyetchisi yü fuseyning dawalinishigha iqtisadiy yardem qildi

Namelum kishiler teripidin qattiq urulup yérim palech qilip qoyulghan kishilik hoquq pa'aliyetchisi yü fusey, gérmaniye hökümitining iqtisadiy yardimige érishti.

Amérika birleshme agéntliqining melum qilishiche, 47 yashliq yü fusey xitayning senshya qurulushida öy-ziminliridin köchürüwétilgen puqralarning menpe'eti üchün xizmet qilghan kishilik hoquq pa'aliyetchisi bolup, u ötken ayda gérmaniyidiki bir téléwiziye istansisining ziyaritini qobul qilip, hökümetning bu puqralargha yéterlik tölem heqqi bermigenlikini pash qilghanliqi sewebidin xu béy ölkilik saqchi da'iriliri teripidin soraqqa tartilghan. Shundaqla saqchixanidin öyige qaytish yolida salahiyiti éniq bolmighan bir nechche kishi uni urup yarilandurghan.

Yüning oghlining éytishiche, tayaq zerbisidin yü fuseyning umurtqisi sunup yérim palech haletke chüshüp qalghan. Shundaqla ularning iqtisadiy yétishmigechke apiratsiye qilishqa amalsiz qalghan. Buningdin xewer tapqan gérmaniyining béyjingdiki elchixanisi yüning apiratsiyisi üchün uninggha 60 ming yüen pul yardem qilghan.

Nöwette kishilik hoquq teshkilatliri we gérmaniye hökümiti xitayning bu weqe üstidin tekshürüsh élip bérishini telep qilmaqta. Shundaqla gérmaniyining béyjingdiki elchixanisining 3 neper xadimi ötken peyshenbe küni yü fusey turushluq doxturxanigha bérip, uni yoqlighan. Yüning oghli puqrache kiyin'gen saqchilarning dadisi yatqan yataqning aldida közitip turiwatqanliqini bildürdi. (Peride)