Xitayning yéngi belgilimiliri j x organlirining hoquqini kücheytti

Xitay hökümiti charshenbe küni " jem'iyet amanliqini tertipke sélish we jazalash qanuni" ni élan qilip, jama'et xewpsizlik organlirigha téximu köp jazalash hoquqi berdi.

En'gliye b b s radi'o-téléwiziye shirkitining xewirige qarighanda, yéngi chiqqan bu qanun burunqigha sélishturghanda j x organlirining jazalash hoquqini téximu kücheytish bilen birge, qanun'gha xilapliq qilghan chet'elliklerni bir terep qilish hemde ularni chégridin qoghlap chiqirish belgilimilirinimu qoshumche qilin'ghan.

Xitay jama'et xewpsizlik ministirliqining qanun-tüzüm idarisi bashliqi ké lyangdong, gerche chet'elliklerni chégradin chiqirish mesiliside éniq belgilime bolmisimu, lékin chet'ellikler xitayning bu "jem'iyet amanliqini tertipke sélish we jazalash qanuni" gha xilapliqla qilidiken, ularning chégradin qoghlap chiqirilish éhtimalliqining barliqini tekitlidi.

Yéngi chiqirilghan bu belgilime yene keng da'iridiki mezmunlarni öz ichige alghan bolup, qanunsiz we jem'iyetke ziyanliq dep qarighan diniy pa'aliyetlerni jazalash jehettimu nurghun belgilimiler körsitilgen. Emma uningda yene, saqchilarning délo béjirgende kishilerni qiyin-qistaqqa élip soraq qilishi cheklen'gen hemde bundaq qilghuchilarning qanuniy mes'uliyiti sürüshte qilinidighanliqi körsitilgen. Xitayda ezeldin saqchilargha köp hoquq bérilgen bolup, bu gherb ellirining izchil eyiblishige uchrap kelgen idi. (Peride)