Чин шүйбйән йеңи йил нутуқида икки қирғақ мунасивити һәққидә тохталди


2005.01.02

Тәйвән президенти чин шүйбйән шәнбә күни бәргән йеңи йиллиқ нутуқида, хитай һөкүмитиниң тәйвәнгә қораллиқ һуҗум қилиш үчүн "қануний асас" яритишқа уруниватқанлиқини қаттиқ әйиплиди. Буниң алдида хитайниң дөләт рәиси ху җинтав, тәйвәнниң хитайдин айрилишиға қәтий йол қоймайдиғанлиқи һәққидә тәһдид салған иди.

Франсийә ахбарат агентлиқиниң хәвиригә қариғанда, чин шүйбйән нутуқида "өткәнки төт йилдин буян, тәйвән хитайға көп қетим тиничлиқпәрвәр яхши нийитини ипадиләп, икки қирғақ сөһбитини қайта башлаш һәққидә актип издәнгәнгән болсиму, бирақ хитай чоң қуруқлиқи, тәйвәнгә қорал ишлитиш тәһтидидин ваз кәчмиди" диди. У йәнә, хитай компартийисиниң нөвәттә "бөлүнүшкә қарши қанун" ни чиқириш арқилиқ , тәйвән боғузиниң һазирқи сиясий һалитини өзгәртишкә уруниватқанлиқини, буниң район вә пүтүн дуняниң бихәтәрликигә зор тәһдид икәнликини тәкитлиди.

Хитайниң дөләт рәиси ху җинтавму йеңи йиллиқ нутуқида хитайниң тәйвән мәсилисидики мәйданини қайта тәкитлигән. У бейҗиңниң , тинич һалда тәйвән билән бирликкә келишкә зор күч чиқиридиғанлиқини, бирақ һечқандақ кишиниң һәр қандақ шәкил билән тәйвәнни бейҗиңдин айришиға йол қоймайдиғанлиқини көрсәткән.

Хитай һөкүмити йеқинда тәйвәнгә қаритилған " бөлүнүшкә қарши қанун лайиһиси" ни музакирә қилған. Бу бейҗиң билән тәйвән мунасивитиниң техиму җиддилишишишгә йол ачқан иди. (Арзу)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.