Вен җябав, йәрлик һөкүмәтләрни тарихий хаталиқ өткүзүш билән әйиблиди

Хитай баш министири вен җябав, йәрлик һөкүмәтләрни деһқанларниң йәр‏- земин мәсилисидә тарихий хаталиқ садир қилған болуши мүмкин, дәп әйиблиди. Вен җябавниң тәкитлишичә, йәрлик даириләрниң йәр ‏-земин мәсилисидики һәрикити йеза‏- кәнтләрниң муқимлиқиға асаслиқ тәһдит болуп қалған. У, " бәзи йәрлик даириләр деһқанларниң йәр‏- земинлирини қанунсиз йоллар билән тартивелип, уларға мувапиқ иқтисади төләм төләп бәрмигән вә турмуш йолини орунлаштурмиған. Бу йеза - кәнтләрдики аммиви наразилиқ һәрикәтлириниң от пилтиси болуп қалмақта " дәйду. Униң тәкитлишичә, деһқанлар тез сүрәтлик шәһәрлишиш тәрәққиятида бәдәл түлимәктә.

Вен җябав бу сөзләрни өткән йили 12 - айда қилған болсиму. Әмма хитай һөкүмәт тәрәп мәтбуатлири буни әмди елан қилди. Хитай һөкүмитиниң статистика қилишичә, хитайда 2005 - йили йүз бәргән аммиви наразилиқ һәрикәтлири 2004 - йилға қариғанда 6 % көпәйгән. Әң йеңи аммиви наразилиқ һәрикити пәйшәнбә күни шинҗен шәһиридә партлиди. Вен җябав, 2005 - йили 12 - айниң 29 - күни қилған шу қетимқи сөзидә, " биз йәр ‏-земин мәсилисидә тарихий хаталиқ садир қилишқа йол қоймаслиқимиз керәк " дәп агаһландурған.

Бәзи көзәткүчиләрниң тәкитлишичә, вен җябавниң бу сөзлири уйғур аптоном районидики юқири дәриҗилик бәзи әмәлдарлар үчүн яхшилиқниң бишарити әмәскән. Уйғур аптоном райониниң рәиси исмайил тиливалди, алдинқи йили хитайда йәр‏- земин ечиш содиси билән шуғуллинидиған җунтоң ширкитиниң баш мудирини қобул қилип, мәзкур ширкәтниң хотән, қәшқәр вә қизилсуларда йәр ‏-земин ечиш содисиға қолайлиқ яритип беридиғанлиқини вәдә қилған. Бу ширкәт артушниң шорух йезисидики 180 аилилик уйғур диһқанниң қора‏- җайини мәҗбури сетивалған иди .(Әркин)