Хитайда 10 йилдин бери 40 милйон деһқан йәр земинидин айрилип қалған


2006.07.24

Хитай даирилириниң дүшәнбә күни елан қилған бир доклатидин мәлум болушичә, хитайда йеқинқи 10 йилдин бери 40 милйондин артуқ деһқан шәһәрлишишниң тәсиригә учрап йәр земинидин айрилип қалған вә кәлгүси 5 йил ичидә йәнә 15 милйон деһқан йәр земинидин мәһрум қелиши мумкин.

Хитай әмгәк вә иҗтимаий саламәтлик министирлиқиниң дүшәнбә күни елан қилған доклатида " өткәнки 10 йил мабәйнидә шәһәрлишишниң тез сүрәттә қанат йейишиға әгишип, 40 милйондин артуқ деһқан йәр земинидин айрилип қалди," дәйду. Доклатта әскәртишичә, кәлгүси бәш йил ичидә йилиға 3 милйон деһқан йәр земинидин айрилиши мумкин.

Җуңго истатистика идариси, өткән йилниң ахириғичә йеза- кәнтләрдә яшайдиған хитай аһалилириниң нопусини 745 милйон, шәһәр аһалисиниң нопусини 562 милйон, дәп елан қилди. Бу йилниң башлирида хитай даирилири, кәлгүси 20 йил ичидә шәһәрләргә көчүп киридиған йеза - кәнт нопусиниң 300 милйонға йетидиғанлиқини вә буниң җуңгода бир қатар җидди мәсилиләрни биргә елип келидиғанлиқини агаһландурған.

Деһқанларни йәр земинидин мәҗбури көчүрүш хитай бойичә һөкүмәт даирилири билән пуқралар арисида бир қатар тоқунушларниң келип чиқишиға сәвәбчи болған. Өткән йили 12 - айда гуаңдоңниң шйәнвей кәнтидә диһқанлар билән сақчилар арисида йәр зимин мәсилисидин тоқунуш келип чиқип аз дегәндә 3 киши сақчилар тәрипидин етип ташланған иди.

Уйғур аптоном райони йәр зимин талаш - тартишидин мустәсна район әмәс. Хитай даирилири йеқиндин бери ақсуниң йеңи базар районидики пуқраларниң өй маканлирини чиқип ташлашқа башлиған болсиму, лекин һазирғичә пуқралар билән сақчилар арисида йәр зимин маҗирасидин келип чиққан зораванлиқ вәқәлири йүз берип бақмиди. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.