Xitayda 10 yildin béri 40 milyon déhqan yer zéminidin ayrilip qalghan

Xitay da'irilirining düshenbe küni élan qilghan bir doklatidin melum bolushiche, xitayda yéqinqi 10 yildin béri 40 milyondin artuq déhqan sheherlishishning tesirige uchrap yer zéminidin ayrilip qalghan we kelgüsi 5 yil ichide yene 15 milyon déhqan yer zéminidin mehrum qélishi mumkin.

Xitay emgek we ijtima'iy salametlik ministirliqining düshenbe küni élan qilghan doklatida " ötkenki 10 yil mabeynide sheherlishishning téz sür'ette qanat yéyishigha egiship, 40 milyondin artuq déhqan yer zéminidin ayrilip qaldi," deydu. Doklatta eskertishiche, kelgüsi besh yil ichide yiligha 3 milyon déhqan yer zéminidin ayrilishi mumkin.

Junggo istatistika idarisi, ötken yilning axirighiche yéza- kentlerde yashaydighan xitay ahalilirining nopusini 745 milyon, sheher ahalisining nopusini 562 milyon, dep élan qildi. Bu yilning bashlirida xitay da'iriliri, kelgüsi 20 yil ichide sheherlerge köchüp kiridighan yéza - kent nopusining 300 milyon'gha yétidighanliqini we buning junggoda bir qatar jiddi mesililerni birge élip kélidighanliqini agahlandurghan.

Déhqanlarni yer zéminidin mejburi köchürüsh xitay boyiche hökümet da'iriliri bilen puqralar arisida bir qatar toqunushlarning kélip chiqishigha sewebchi bolghan. Ötken yili 12 - ayda gu'angdongning shyenwéy kentide dihqanlar bilen saqchilar arisida yer zimin mesilisidin toqunush kélip chiqip az dégende 3 kishi saqchilar teripidin étip tashlan'ghan idi.

Uyghur aptonom rayoni yer zimin talash - tartishidin mustesna rayon emes. Xitay da'iriliri yéqindin béri aqsuning yéngi bazar rayonidiki puqralarning öy makanlirini chiqip tashlashqa bashlighan bolsimu, lékin hazirghiche puqralar bilen saqchilar arisida yer zimin majirasidin kélip chiqqan zorawanliq weqeliri yüz bérip baqmidi. (Erkin)