Xitay déhqanlar yer - zémin dawasida hökümetni yengdi

Xitayning xébéy ölkiside puqralar bilen da'iriler otturisidiki qanliq toqunushqa sewebchi bolghan yer- zémin dawasida déhqanlar ghelibe qildi.

Xébéyning dingju shehri shünyö kentidiki déhqanlar bilen shu jaydiki da'iriler otturisida 6 - ayning 11 - küni yüz bergen toqunushning sin'alghusi, chet'el metbu'atlirida qoyulghandin kéyin küchlük inkas qozghighan. Toqunush shu jaydiki bir éléktir istansisi shünyö kentidiki déhqanlarning yérini ishlitip heqqini toluq bermigenlikidin kélip chiqqan. Bu 11 iyundiki zor kölemlik toqunushni peyda qilghan bolup, 31 kishi da'iriler teripidin qolgha élin'ghan.

B b s ning xewer qilishiche da'iriler déhqanlarning yérini ishlitishtin waz kechken. Xitayning hökümet zuwani shinxu'a axbarat agéntliqi " döletning éléktir istansisi qurulushigha kapaletlik qilish, éléktir istansisi qurulushi élip bériliwatqan jayda nopus köp yer az bolush ehwalini közde tutup, xébéy ölkilik hökümet we bawding shehiri déhqanlarning yérini ishlitmeslikni qarar qildi," dep xewer berdi.

Bu arida "nyu york waqti géziti" ning ashkarilishiche, sherqiy jéjangda déhqanlar muhitni bulghighanliqi sewebidin mezkur rayondiki bir dora zawutini ishtin toxtashqa mejbur qilghan. (Erkin)