Xitay hökümiti jaw ziyangni xatirilesh pa'aliyitini cheklidi

Xitay hökümiti ötken yili ölgen, xitay kompartiyisining sabiq bash sékrétari jaw ziyangni xatirilesh üchün uyushturulghan bir yéghinni cheklep, bu yéghinni teshkilligenlerning birini tutup nechchiligen pa'aliyetchini nezerbentke alghan.

Fransiye agéntliqining xewer qilishiche, béyjingda xitaydiki ataqliq öktichi adwukat gaw jéshing we tyen'enmindiki basturush jeryanida her ikki putidin ayrilghan chi jiyung qatarliq kishilik hoquq pa'aliyetchiliri 9 ‏- yanwar küni ötken yili 17 ‏- yanwar küni ölgen jawziyangning ölümining bir yilliqini xatirilesh üchün, xatirilesh pa'aliyitini teshkilligenlerning biri bolghan li jinpingning öyige yighilip, u yerdin jaw ziyangning öyige bérip uning ayali bilen körüshüshni pilanlighan.

Emma xitay saqchiliri yekshenbe küni li jinpingni tutup ketken hemde az dégende yene besh pa'aliyetchini nezerbentke alghan. Shundaqla 10 etrapida saqchi jaw ziyangning öyini qorshap kishilerning öyge kirishige ruxset bermigen.

Xewerlerge qarighanda, xitayda nurghun kishiler jaw ziyangni xelq qehrimani dep qaraydu, shunga xitay rehberliri, siyasiy öktichilerning jaw ziyangdin xelqni hökümetke qarshi qozghash üchün bir simwol süpitide paydilinishidin endishe qilidiken. Xitay rehberliri jaw ziyang ölgen waqtida xelqning uning depne murasimigha qatnishishining aldini alghan idi. (Qanat)