Xitayning gherbidiki rayunlarda milliy toqunushlar keskinleshmekte

Firansiye axbarat agéntliqi muxbirining düshenbe küni chingxeydin xewer qilishiche, xitayda nöwette xitaylar bilen az sanliq milletler arisidiki toqunush keskin bolupla qalmastin, belki az sanliq milletler arisidiki toqunushmu ewj almaqta.

Muxbirning misal qilip körsitishiche, chingxeyning jiyangza kentide ötken yili ikkinchi ayda tungganlar bilen tibetler otturisida qattiq toqunush yüz bergen. Bir nechche tunggan bilyard oynap bir tibetlik bilen jidelliship qalghandin kiyin, uni urup öltürüp qoyghan. Netijide pütün kenttiki tibetler qozghulup, tungganlarning ashxanilirigha hojum qilghan. Weqede nurghun adem yarilan'ghan. 10 Tunggan qolgha élin'ghan. Shundin boyan jiyangza kentide tungganlar bilen tibetler otturisida öchmenlik dawamlashmaqta.

Muxbirning yene körsitishiche, bundaq milliy toqunushlar jiyangzadila bolup qalmastin, Uyghur élidimu mewjüt bolup, Uyghurlar bilen qazaqlar otturisidimu ixtilablar bar iken.

Muxbirning otturigha qoyishiche, esirlerdin boyan öz- ara inaq yashawatqan milletlerning otturisida ziddiyetlerning ewj élishi kishini tolimu heyran qalduridighan bir ehwal iken. Chet'eldiki bir qisim Uyghur küzetküchiliri, xitay hökümitini milletlerni bölüp bashqurush siyasiti yürgüzüp, milliy ziddiyetlerni peyda qiliwatidu dep eyiplimekte. (Arzu)