Дуня сәһийә тәшкилати хитайни қуш зукам вируси тоғрисида агаһландурди


2006.11.03

Дуня сәһийә тәшкилати җүмә күни хитайни агаһландуруп, қуш зукам вирусини йошуруш бу әҗәллик вирусниң өзгириш ясаш вә тарқилиш әһвалини байқашни қийинлаштурмақта, дәп көрсәтти.

Франсийә ахбарат агентлиқиниң хәвәр қилишичә, дуня сәһийә тәшкилатиниң әмәлдари җулийә холл қуш зукам вирусиниң әһвали һәққидә тохтилип, " хитайда вәзийәт наһайити қалаймиқан шундақла вирус һәққидики учурлар бир - биригә зит" дәп тәкитлигән.

У, " биз хитайда қуш зукам вирусиниң зади қанчә түри барлиқини билмәймиз. Чүнки бизниң хитай йеза игилик министирлиқи билән учур алақимиз наһайити чәклик. Биз вирус өлгисини тәләп қилған болсақму, лекин улар бәрмиди," дәйду. Хоңкоң вә америка мутәхәссислири хитайни йеңи түрдики қуш зукам вирусиниң һуҗумиға дуч келиватқанлиқини агаһландурған болсиму,хитай һөкүмити пәйшәнбә күни буни рәт қилди. Хитай йеза игилик министирлиқи америка мутәхәссислириниң бу һәқтики доклатини" толуқ пакитлар билән испатланмиған " дәп көрсәтти.

Лекин дуня сәһийә тәшкилатидики җулийә холлниң әскәртишичә, мутәхәссисләр йеңи түрдики вирус тоғрисида сөз қилмиған. У, мутәхәссисләрниң хитайни шәкли өзгирип бәрдашлиқ бериш күчи техиму күчлүк болған вирус тоғрисида агаһландурғанлиқини билдүрди. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.