ໃນ ວັນສຸກ ທີ 23 ພືສພາ ນີ້, ກໍ່ມີ ຂ່າວວ່າ ໄດ້ ເກີດ ເຫດການ ຮ້າຍແຮງ ຂຶ້ນ ໂດຍມີ ມົ້ງ ຮາຍງານ ວ່າ ພວກຕົນ ຖືກ ເຈົ້າໜ້າທີ່ໄທ ລົງໂທດ ໂດຍ ການຈັບກຸມ ທຳຮ້າຍ ຮ່າງກາຍ ແລະ ຮ້າຍໄປ ກວ່ານັ້ນ,  ໄດ້ ຈູດເລົາ ເຜົາໄໝ້ ທີ່ອາໃສ ຂອງ ພວກຕົນ.

“ຜົມ ເປັນ ຜູ້ເຫັນ ກັບຕາ, ມີ ສັກຂິ ພຍານ ຮຽບຮ້ອຍ ວ່າ ທະຫານ ເປັນຄົນ ລົງມືຈູດເອງ. ໄມ້ມີ, ໄມ້ມີໃຜ ລົງມື, ພວກເຮົາ ເຫັນກັບຕາ ເລີຍນ໊ະຄັບ”

ເຈົ້າໜ້າທີ່ໄທ ທ່ານ ນຶ່ງ ທີ່ ບໍ່ປະສົງ ອອກຊື່ ໄດ້ ຢືນຢັນ ກັບ ເອເຊັຍເສຣີ ວ່າ  ມີໄຟໄໝ້ ທີ່ພັກ ຂອງ ຊາວມົ້ງ ທີ່ ສູນ ບ້ານ ຫ້ວຍນ້ຳຂາວ ແທ້  ແລະ ວ່າ ເປັນ ການຈົງໃຈຈູດ ເອງ ໂດຍ ມົ້ງ ກຸ່ມນຶ່ງ ພາຍໃນສູນ ທີ່ ຢາກ ສ້າງ ສຖານະການ ຂຶ້ນ ເພາະ ໄຟໄໝ້ ມາຈາກ ທາງດ້ານຫລັງ, ຊຶ່ງ ເປັນເຮືອນ ຂອງ ພວກປະທ້ວງ.

ເຈົ້າໜ້າທີ່, ທ່ານ ຍັງອ້າງ ອີກວ່າ ການກະທຳ ຂອງ ຊາວມົ້ງລາວ ເທື່ອນີ້ ຖືເປັນ ຄວາມຜິດ ຖານທຳລາຍ ຊັພສິນ ຂອງ ທາງການໄທ ຈຶ່ງຕ້ອງ ດຳເນິນການ ຕາມ ຂັ້ນຕອນ ທາງກົດໝາຍ.

ໃນ ບ່າຍ ວັນສຸກ ນີ້, ໜັງສືພິມ “ຜູ້ຈັດການ” ຣາຍງານວ່າ: ມີ ຊາຍມົງລາວ ຜູ້ນຶ່ງ ອາຍຸ 40 ປີ ເສັຍຊີ້ວິຕ; ແຕ່ ບໍ່ໄດ້ ບອກວ່າ ດ້ວຍເຫດໃດ.

ຊາວລາວ ເຜົ່າມົ້ງ ຫລາຍກວ່າ 30 ຄົນ ໃນ ສູນ ບ້ານຫ້ວຍນ້ຳຂ່າວ ໄດ້ເລີ້ມ ອົດອາຫານ ມາ ແຕ່ ວັນທີ່ 16 ພຶສພາ ເພື່ອ ປະທ້ວງ ການທີ່ ຫົວໜ້າ ຂອງ ພວກຕົນ ຖືກຈັບ ແລະ ການທີ່ ພວກຕົນ ຈະຖືກ ບັງຄັບ ສົ່ງ ກັບ ປະເທດລາວ ແລະ ວ່າ 4 ປີ ທີ່ຢູ່ ຫ້ວຍນ້ຳຂາວ ບໍ່ມີ ອົງການ ສາກົນ ໃດໆ, ໂດຍສເພາະ ອົງການສາຫະປະຊາຊາຕ ມາດູລຳຄຳແຍງເລີຍ ແລະ ວ່າ ພວກຕົນ ຂໍ ບໍ່ໃຫ້ສົ່ງກັບ ປະເທດລາວ ເພາະ ຢ້ານຈະເປັນ ອັນຕລາຍ ແກ່ພວກຕົນ. ແຕ່ ທາງການລາວ ແລະ ໄທ ຫາກຢືນຢັນ ສເມີ ມາ ວ່າ ພວກມົ້ງ ທີ່ ຖືກສົ່ງ ກັບລາວ ນັ້ນ, ກັບໄປ ດ້ວຍ ຄວາມສມັກໃຈ.

ຄຳສັບ ຊອກຫາຂໍ້ມູນ: ອົບພຍົບ Refugee ຊາວມົ້ງລາວ laohmong ສະຫະປະຊາຊາດ Unitednations

ຄວາມເຫັນ

ທ່ານສາມາດອອກຄວາມເຫັນໄດ້ໂດຍຂຽນຂໍ້ຄວາມໃສ່ຂ້າງລຸ່ມນີ້. (ໃຊ້ຮູປແບບທັມມະດາ).ຄວາມເຫັນທັງໝົດຕ້ອງຜ່ານການກວດກາແລະຈະບໍ່ອອກໃຫ້ເຫັນໃນປັດຈຸບັນ. ກະຣຸນາກວດເບິ່ງໃໝ່ໃນອີກບໍ່ດົນ ບາງທີຄວາມເຫັນຂອງທ່ານໄດ້ຂື້ນຕິດໄວ້ແລ້ວ.