ຊາວ​ມົ້ງ ຜູ້​ທີ່​ຖືກ​ກັກ​ຂັງ ທີ່​ດ່ານ​ກວດຄົ້ນ​ເຂົ້າ​ເມືອງ ທີ່​ແຂວງ​ໜອງ​ຄາຍ ຮຽກຮ້ອງ​ໃຫ້ ຂ້າ​ຫລວງ​ໃຫຍ່ ອົງການ​ ສະຫະ​ປະຊາ​ຊາດ ດ້ານ​ອົພຍົບ​ ​ເຂົ້າມາແກ້​​ໄຂ ບັນຫາ ​ຊ່ອຍ​ພວກ ​ຂະ​ເຈົ້າ​ໃຫ້​ອອກ​ໄປ​ຈາກ​ທີ່​ນີ້. ທ້າວ Ner Long Tor, ລາວ​ມົ້ງ ຈາກ ​ແຂວງລົບບູຣີ​ ຜູ້​ທີ່​ເຄີຍ​ໄປ​ຢ້ຽມຢາມ ລາວ​ມົ້ງ ທີ່ ສູນກັກ​ຂັງ ​ແຂວງ​ໜອງ​ຄາຍ ​ເວົ້າວ່າ ສພາບ​ຄວາມ​ເປັນ​ຢູ່​ ຂອງ​ຊາວ​ມົ້ງ ຈຳນວນ 154 ຄົນ​ ທີ່ຖືກ​ກັກ​ຂັງ ຢູ່​ດ່ານ​ກວດຄົ້ນ​ເຂົາ​ເມືອງ ແຂວງ​ໜອງ​ຄາຍ ​ນັ້ນ, ເວລາ​ນີ້ ຕົກ​ຢູ່​ໃນ​ຄວາມ​ລຳບາກ, ຕ້ອງການ ​ຢາກ​ໃຫ້​ອົງການ ​ສະຫະ​ປະຊາຊາດ ​ດ້ານ​ອົພຍົບ ​ເຂົ້າ​ໄປ​ຊ່ອຍ​ ພວກ​ຂະເຈົ້າ ​ເພາະ​ພວກ​ຂະ​ເຈົ້າ ​ຖືກ​ກັກ​ຂັງ​ຢູ່ ສູນ​ແຫ່ງ​ນີ້ ດົນກ​ວ່າ 1 ປີ ​ແລ້ວ; ດັ່ງ​ທ້າວ Ner Long Tor ​ກ່າວ​ໃນ​ຕອນ​ນື່ງວ່າ:

“UN ບອກ ຫ້ອງການ​ທີ່​ດູ​ແລ​ຊາວ​ອົພຍົບ ວ່າ ພວກ​ເຂົາ​ເຂົ້າ​ໄປ​ຊ່ອຍ​ບໍ​ໄດ້ ​ແລະ​ກໍ່​ບອກ​ວ່າ​ລໍຖ້າຜົລ ຂອງຣັຖບານ​, ຖ້າຣັຖບານ ​ອະນຸຍາດ​ໃຫ້ປ່ອຍ ກໍ່​ປ່ອຍ​ໄດ້ ຫາກ​ເຂົາ​ບໍ່​ອະນຸຍາດ ​ກໍ່​ປ່ອຍ​ບໍ່​ໄດ້.”

ທ້າວ Ner Long Tor ຍັງ​ບອກ​ອີກ​ວ່າ ຊາວ​ມົ້ງກຸ່ມ​ດັ່ງກ່າວໄດ້​ສອບ​ຖາມ​ ກັບ​ອົງການ​ ທີ່​ໃຫ້ການ​ຊ່ອຍ​​ເຫລືອທາງ​ດ້ານ​ອາຫານ​ການ​ກີ​ນ ທຸກ​ຄັ້ງວ່າ ອານາ​ຄົດ​ ຂະເຈົ້າ​ ຈະ​ເປັນ​ໃດ, ພວກ​ຂະ​ເຈົ້າ ​ບໍ່​ຢາກ​ຖືກ​ສົ່ງ​ກັບ ສປປລາວ ຄື​ກຸ່ມ​ອື່ນໆ ​ເພາະ​ຢ້ານ​​ບໍ່​ປອດ​ພັຍ. ຖ້າ​ຈະ​ສົ່ງ​ກັບ ຈະຂໍ​ຕາຍ ຢູ່​ສູນບ່ອນ​ນີ້ ​​ແທນທີ່​ ຈະ​ກັບ​ລາວ, ດັ່ງທ້າວ Ner Long Tor ​ກ່າວ​ເພີ້​ມອີກ​ວ່າ:

“ຕອນ​ນີ້ ​ກໍ​ສບາຍ​ດີ; ແຕ່​ຈິດ​ໃຈ ​ຂອງ​ພວກ​​ຂະ​ເຈົາ ກໍ່​ບໍ່​ຢາກ​ຢູ່ ຕ. ມ. ໜອງ​ຄາຍ ​ເພາະ​ຢູ່​ມາ​ນານ​ແລ້ວ, ນະ​ໂຍບາຍ​ ຂອງຣັຖບານ​ໄທ ​ບໍ່​ເປີດ​ໃຫ້​ອອກ, ມັນ​ກໍບໍ່​ໄດ້​ອອກ. ​ເຣື້​ອງທີ່​ກັບ​ລາວ​ ເຂົາ​ກໍ່​ບໍ່​ຢາກ​ກັບ, ບໍ່​ປ່ອຍ​ອອກ ຖ້າ​ຈະ​ກັບ​ລາວ​ ໃຫ້​ຕາຍ​ໃນ ຕ. ມ. ​ເຂົາ​ກໍ​ຍອມ​ຕາຍ.”

ປັດຈຸບັນ ມີ​ຊາວ​ມົ້ງ ທີ່​ອາສັຍ ​ຢູ່​ສູນ​ກັກ​ຂັງ ໜອງ​ຄາຍ ​ປະມານ 154 ຄົນ, ​ໃນນັ້ນ ມີ​ຜູ້​ໃຫຍ່ 58 ຄົນ​, ເດັກນ້ອຍ 92 ຄົນ ​ແລະ ມີ​ຄົນ​ຖືພາ 1 ຄົນ. ບາງ​ຄົນ​ກໍ່​ໄດ້​ລັກໜີ​ໄປ ​ເພາະ​ທົນ​ຕໍ່ສພາບ ​ອັງ​ອໍ ​ບໍ່​ໄດ້. ຢູ່ບ່ອນ​ກັກ​ຂັງ ຂາດ​ໝົ​ດ ທຸກ​ຢ່າງ, ​ແມ່ນ​ແຕ່ ການ​ອອກກຳລັງ​ກາຍ ​ກໍ່​ອະນຸຍາດ​ໃຫ້​ຂະເຈົ້າ ​ອອກ​ຈາກຫ້ອງ​ກັກ​ຂັງ ​ພຽງ​ແຕ່ ມື້​ລະ 2 ຊົ່ວໂມງ ​ເທົ່າ​ນັ້ນ. ກຸ່ມ​ດັ່ງກ່າວ ​ຢາກ​ໄປ​ຕັ້ງຖີ່​ນຖານ ​ຢູ່  ​ປະ​ເທດ​ທີ 3, ບໍ່​ຢາກ​ກັບ ສ​ປປລາວ.

ຄວາມເຫັນ

ທ່ານສາມາດອອກຄວາມເຫັນໄດ້ໂດຍຂຽນຂໍ້ຄວາມໃສ່ຂ້າງລຸ່ມນີ້. (ໃຊ້ຮູປແບບທັມມະດາ).ຄວາມເຫັນທັງໝົດຕ້ອງຜ່ານການກວດກາແລະຈະບໍ່ອອກໃຫ້ເຫັນໃນປັດຈຸບັນ. ກະຣຸນາກວດເບິ່ງໃໝ່ໃນອີກບໍ່ດົນ ບາງທີຄວາມເຫັນຂອງທ່ານໄດ້ຂື້ນຕິດໄວ້ແລ້ວ.