ການສ້າງຣະບົບປ້ອງກັນ ຕາຝັ່ງເຈື່ອນ ຢຸດສງັກ
ອາວະຣີ ຣາຍງານ
2009-06-28
ການສ້າງ ຣະບົບປ້ອງກັນ ຕາຝັ່ງເຈື່ອນ ຢູ່ຕໍ່ໜ້າ ນະຄອນຫລວງ ວຽງຈັນ ຢຸດສງັກລົງ ເພາະສອງ ບໍຣິສັດ ໄດ້ຮັບສັມປະທານ ການກໍ່ສ້າງ ໂຄງການດຽວກັນ ແລະ ປັດຈຸບັນ ກຳລັງ ຂັດແຍ້ງກັນແຮງ ເຖິງຂັ້ນຟ້ອງກັນ ຂື້ນສານ.
ຕາຝັ່ງ ແຄມຂອງ ບ້ານເກົ້າລ້ຽວ ເຈື່ອນ ຢ່າງໜ້າວິຕົກ
ການກໍ່ສ້າງ ຣະບົບປ້ອງກັນ ຕາຝັ່ງເຈື່ອນ ແລະ ພັທນາແຄມຂອງ ນັບແຕ່ ທ່າປາກປ່າສັກ ລົງໄປຫາໂຮງໝໍມະໂຫສົດ ໄດ້ຢຸດຕິລົງ ຢ່າງບໍ່ມີກຳນົດ ເມື່ອສັບປະດາທີ່ແລ້ວ ເພາະມີສອງ ບໍຣິສັດ ຕ່າງກໍມີສັນຍາສັມ ປະທານໃນໂຄງການການ ກໍ່ສ້າງດັ່ງກ່າວ ແລະ ເມື່ອບໍ່ດົນຜ່ານມາ ໃນຂະນະທີ່ ບໍຣິສັດນຶ່ງກຳລັງກໍ່ສ້າງຢູ່ ອີກບໍຣິສັດນຶ່ງ ພັດມາຂັດຂວາງ ແລະ ພະນັກງານ ຂອງທັງສອງ ບໍຣິສັດ ໄດ້ປະທະຄາລົມຢ່າງແຮງ ເຖິງຂື້ນຝ່າຍນຶ່ງ ໄດ້ຈົກປືນອອກມາຂູ່ ແຕ່ໃນທີ່ສຸດ ກໍບໍ່ມີເຫດຮ້າຍແນວໃດເກີດຂື້ນ ທັງບໍຣິສັດ ໄດ້ຟ້ອງກັນ ຂື້ນສານ.
ບໍຣິສັດທັງສອງ ຂັດແຍ້ງກັນ ຍ້ອນທາງການລາວ ໃຫ້ສັມປະທານ ແກ່ສອງບໍຣິສັດນີ້ ສຳຣັບກໍ່ສ້າງໂຄງການດຽວກັນ. ເຣື່ອງມີຢູ່ວ່າ ຣັຖບານລາວ ໃຫ້ສັມປະທານ ແກ່ບໍຣິສັດ Modern Home ຂອງໄທແຕ່ປີ 1999 ເພື່ອກໍ່ສ້າງ ຣະບົບປ້ອງກັນຕາຝັ່ງເຈື່ອນ ຢູ່ຕໍ່ໜ້າ ນະຄອນຫລວງວຽງຈັນ ແຕ່ນັບແຕ່ປີນັ້ນ ມາເຖິງປີກາຍ ບໍຣິສັດນີ້ ບໍ່ໄດ້ເລິ້ມການກໍ່ສ້າງ ແນວໃດເລີຍ ຫາກໍເລິ້ມ ເມື່ອບໍ່ດົນຜ່ານມາ; ໃນຂະນະດຽວກັນ ເມື່ອຕົ້ນປີນີ້ ຣັຖບານລາວ ໄດ້ຮັບເງິນກູ້ຢືມ ດ້ວຍດອກເບັ້ຍຕ່ຳ ຈາກເກົາຫລີໃຕ້ 37 ລ້ານດອນລ່າສະຫະຣັຖ ເພື່ອສ້າງຣະບົບ ປ້ອງກັນຕາຝັ່ງເຈື່ອນນັ້ນ ແລະ ໃນເມື່ອຢືມເງິນ ຈາກເກົາຫລີໃຕ້ ທາງຣັຖບານລາວ ກໍຕ້ອງໃຫ້ ສັມປະທານ ແກ່ບໍຣິສັດ ເກົາຫລີໃຕ້ ເປັນຜູ້ຮັບເໝົາ ກໍ່ສ້າງ.
ກ່ອນນີ້ບໍ່ດົນ ທາງບໍຣິສັດເກົາຫລີໃຕ້ ໄດ້ພະຍາຍາມ ຕົກລົງ ກັບບໍຣິສັດຂອງໄທ ຄື ໄດ້ສເນີ ຈະຈ່າຍຄ່າກໍ່ສ້າງ ທີ່ບໍຣິສັດຂອງໄທ ໄດ້ເລິ້ມໄປແລ້ວນັ້ນຄືນ ແຕ່ປະກົດວ່າ ບໍ່ສາມາດຕົກລົງກັນໄດ້. ສິ່ງທີ່ເຮັດໃຫ້ ເຣື່ອງນີ້ ຍຸ້ງຍາກຕື່ມ ກໍແມ່ນ ບໍຣິສັດ Modern Home ຂອງໄທ ມີຫຸ້ນສ່ວນ ກັບບໍຣິສັດ ຍັກໃຫຍ່ຂອງລາວ ແລະ ມີຜູ້ທີ່ມີອິດທິພົນ ດ້ານການເມືອງ ແລະ ການເງິນ ຂອງລາວໜູນຫລັງຢູ່.
ຄວາມເຫັນ
ທ່ານສາມາດອອກຄວາມເຫັນໄດ້ໂດຍຂຽນຂໍ້ຄວາມໃສ່ຂ້າງລຸ່ມນີ້. (ໃຊ້ຮູປແບບທັມມະດາ).ຄວາມເຫັນທັງໝົດຕ້ອງຜ່ານການກວດກາແລະຈະບໍ່ອອກໃຫ້ເຫັນໃນປັດຈຸບັນ. ກະຣຸນາກວດເບິ່ງໃໝ່ໃນອີກບໍ່ດົນ ບາງທີຄວາມເຫັນຂອງທ່ານໄດ້ຂື້ນຕິດໄວ້ແລ້ວ.
ເບິ່ງຄວາມເຫັນທັງໝົດ.