ລາວ ແລະ ວຽດນາມ ຕົກລົງກັນ ເພື່ອສືບຕໍ່ ຈັດ ແຜນຍຸທສາດ ການຮ່ວມມື ຣະຫວ່າງກັນ ທາງດ້ານເສຖກິດ, ວັທນະທັມ, ການສຶກສາ, ອຸດສາຫະກັມ, ກະສິກັມ ແລະ ປ່າໄມ້ ພ້ອມກັບ ສຸມໃສ່ ການພັທນາ ດ້ານຊັພຍາກອນ ມະນຸດ.

ຂໍ້ຕົກລົງ ດັ່ງກ່າວ ໄດ້ມີການເຫັນພ້ອມຮ່ວມກັນ, ໂດຍຝ່າຍລາວ ໄດ້ແກ່ ທ່ານສົມສວາດ ເລັ່ງສວັດ, ຮອງນາຍົກ ຣັຖມົນຕຣີ ແລະ ຝ່າຍວຽດນາມ ໄດ້ແກ່ ທ່ານ ຫງຽນ ຊິນ ຮຸ໋ງ, ຮອງນາຍົກ ຣັຖມົນຕຣີ ວຽດນາມ ທີ່ກຸງຮ່າໂນ້ຍ, ເມື່ອວັນທີ 30 ຕຸລາ ຜ່ານມາ.

ນອກຈາກນັ້ນ, ຜູ້ນໍາທັງສອງທ່ານ ຍັງໄດ້ຕົກລົງກັນ ໃນດ້ານການລົງທຶນຮ່ວມ ທາງດ້ານກະສິກັມ ເປັນຕົ້ນແມ່ນ ການປູກພືດ ແລະ ຢາງພາຣາ ໃນສປປລາວ. ທ່ານ ຮຸ໋ງ ກ່າວວ່າ ການປະສານງານ ກັບລາວ ໃນການປະຕິບັດ ຂໍ້ຕົກລົງ ຈະໄດ້ຮັບຜົນປໂຍດ ທັງສອງປະເທດ. ພ້ອມດຽວກັນນັ້ນ, ທ່ານ ຍັງເນັ້ນ ເຖິງຄວາມຈໍາເປັນ ເພື່ອຮີບເລັ່ງ ການສ້າງຖນົນ ຣະຫວ່າງ ເມືອງຂວາ-ໄຕຈັ໋ງ ທີ່ເຊື່ອມຕໍ່ ແຂວງພາກເໜືອ ຂອງລາວ ໄປຍັງ ແຂວງດຽນບຽນຟູ ແລະ ແຂວງ ທາງພາກເໜືອ ຂອງວຽດນາມ.

ທ່ານ ຫງຽນ ຊິນ ຮຸ໋ງ ກ່າວຕື່ມວ່າ ຍຸທສາດ ທາງດ້ານການຂົນສົ່ງ ມີບົດບາດສໍາຄັນ ໃນການພັທນາ ເສຖກິດ-ສັງຄົມ ແລະ ຄວາມສງົບສຸກ. ສ່ວນທາງ ສົມສວາດ ເລັ່ງສວັດ ກໍຂອບໃຈ ກັບຣັຖບານ ວຽດນາມ ທີ່ໄດ້ຊ່ອຍເຫລືອ ຫລາຍໆດ້ານ, ໂດຍສະເພາະ ໃນການກະກຽມ ໂຄງຮ່າງພື້ນຖານ ເພື່ອຮອງຮັບ ການແຂ່ງຂັນ ກິລາ ເອເຊັຍ ຕາເວັນອອກສ່ຽງໃຕ້ ຫລື ຊີເກມສ໌ ທີ່ລາວ ຮັບເປັນເຈົ້າພາບ ໃນເດືອນ ທັນວານີ້.