ខ្លះសួរថា តើវិធីនេះមានការស្រាវជ្រាវរកឃើញអធិប្បាយបានតាមវិធីវេជ្ជសាស្ត្រត្រឹមត្រូវ ឬក៏គ្រាន់តែជាតម្រាបានពីការយល់សប្តិយល់សូងប៉ុណ្ណោះ? ខ្លះចង់ដឹងថែមទៀតថា ប្រាកដជាមានមនុស្សសះជាពីជំងឺតម្កាត់ដោយសារការផឹកទឹកមែនឬ ដូច្នេះជាដើម?
ថ្ងៃនេះ ខ្ញុំសុំលើកយកសម្តីរបស់លោក ចាន់ សារុំ មន្ត្រីរដ្ឋករទឹកស្វយ័តក្រុងភ្នំពេញ មកជម្រាបបន្ថែមទៀត។ ខ្ញុំបាទបានជួបលោក សារុំ និងគ្រួសារនៅឯអាហារដ្ឋានមួយកន្លែងកាលពីរាត្រីមួយនោះ។
លោក សារុំ រាងស្តើងសំបុរស្រអែមមុខមាត់បង្ហាញពីសុខភាពល្អ បើមិនប្រាប់ច្បាស់ជា មិនដឹងថា លោកធ្លាប់មានជំងឺតម្កាត់ច្រើនមុខឡើយ គឺលោកមានជំងឺតាំងពីវិលមុខជាប្រចាំ ឫសដូងបាត លើសឈាមដល់ចុកដៃចុកជើងនិងបត់ជើងតូចរាល់យប់មួយយប់ៗជាច្រើនដងទាំងដែលលោកមានអាយុទើបនឹង ៥០ប្លាយប៉ុណ្ណោះ។ ដើមឡើយ លោកបានទទួលការណែនាំពីលោក ឆុង ទីន ដែលមុនលោកត្រូវតែងតាំងជាឯកអគ្គរាជទូតខ្មែរប្រចាំ ក្រុងរ៉ង់ហ្គូន លោកជាមន្ត្រីធំមួយរូបនៅក្រសួងការបរទេស។
លោក សារុំ មានប្រសាសន៍ដូច្នេះថា ៖ «ឯកឧត្ដម ឆុង ទីន មុនដំបូង គាត់សួរខ្ញុំពីរឿងអ្នកដំបៅងារ អ្នកខេត្តកំពង់ចាម ស្គន់នេះ គាត់ថា បើដំបៅងារយកអីអ៊ឹមលាបបានទេ? ខ្ញុំថា លាបអីអ៊ឹមជាតើដំបៅងារ ហើយកើតឫសដូងបាតក៏លាបជាដែរ។ ហើយឯកឧត្ដម ឆុង ទីន គាត់និយាយថា អត់ទេខ្ញុំពិសោធហូបទឹក ៥ខែជាឫសដូងបាត ប៉ុន្តែខ្ញុំអត់ហ៊ាននិយាយថាមិនជឿគាត់ទេ ព្រោះឯកឧត្ដមរដ្ឋលេខាធិការក្រសួងការបរទេស សហប្រតិបត្តិការអន្តរជាតិ ដល់អ៊ីចឹង យើងរឿងអីថា គាត់ភយើង ប៉ុន្តែគ្រាន់តែថា ក្នុងចិត្តអត់ជឿ ហើយគាត់ក៏មិនមែននឹកឃើញថា គាត់ប្រូ[កុហក]យើងដើម្បីលក់ទឹកទេ ព្រោះគាត់រដ្ឋលេខាធិការក្រសួងការបរទេសឯណោះ គាត់ក៏ថាបើខ្ញុំទំនេរ ឲ្យខ្ញុំទៅជួបគាត់នៅក្រសួងការបរទេស។ ដល់ខ្ញុំទៅជួបគាត់នៅក្រសួងការបរទេស គាត់សរេសរសៀវភៅហ្នឹងដាក់ឲ្យខ្ញុំថា ជូនប្អូន សារុំ ទុកជាការរាប់អាន។ អ៊ីចឹងយកមកដល់ខ្ញុំចាប់ហូបអនុវត្តតាមសៀវភៅ»។
លោក សារុំ មានប្រសាសន៍ថា ក្រោយលោកបដិបត្តិតាមសៀវភៅដែលបានទទួល ពីលោក ឆុង ទីន លោកបានជាសះស្បើយពីជំងឺយ៉ាងគួរឲ្យអស្ចារ្យក្នុងចិត្ត ៖ «ដល់ខ្ញុំចាប់ផ្ដើមហូបតាមសៀវភៅអ៊ីចឹង យប់ឡើងយើងនោម ជួនកាលវាមីងមាំងៗចង់ដួល ដល់យើងហូបពី ៧ថ្ងៃទៅ ១០ថ្ងៃហ្នឹង ភ្ញាក់ឡើងដូចស្រឡះក្នុងចិត្ត។ ពីមុនមិនទាន់ហូបទឹកខ្ញុំនោមច្រើនណាស់យប់ឡើង តិចបំផុត ៥ដង ពេលដែលខ្ញុំហូបទឹកបានពីមួយអាទិត្យទៅ ១០ថ្ងៃ ខ្ញុំនោមមួយយប់តែ ២ដងទេ ពីម៉ោង ១០នោមម្ដង ហើយម៉ោង ៥ ដែលខ្ញុំហូបទឹកហ្នឹងម្ដង តែ ២ដងទេ។ យើងហូបពេលព្រឹក។ ដល់យើងហូបបានរយៈពេលពី ១ខែឡើងទៅ ក្នុងខ្លួនយើងដូចថា អារម្មណ៍យើងសប្បាយរីករាយខ្លួនយើង ភ្ញាក់ឡើងដូចសប្បាយចិត្តតែម្ដង គ្មានកង្វល់អី»។
លោកអួតសរសើរពីប្រសិទ្ធភាពនៃការប្រើវិធីនេះថា ៖ «ដល់អ៊ីចឹង ចេះតែនឹកឃើញថា ចាស់ៗដែលគាត់មានរោគដូចជាទឹកនោមផ្អែម លើសឈាមអីហ្នឹងអាណិតគាត់ ក៏ចេះតែចែកជូនគាត់សម្បទានជូនគាត់ ហើយមិនមែនផ្សាយដើម្បីលក់ទឹក លក់សៀវភៅទេ ជូនដោយសុទ្ធចិត្តរបស់យើងហ្នឹងតែម្ដង ដើម្បីធ្វើម៉េចឲ្យបានរស់ទាំងអស់គ្នា ពីព្រោះថា ចំណាយបើយើងទៅលេបថ្នាំអីៗក៏វាអស់លុយច្រើន ប៉ុន្តែបើយើងហូបទឹក វិធីព្យាបាលនេះដោយអត់អស់លុយ ហើយវាអត់មានប៉ះពាល់ទៅថា ប្រតិកម្មដូចថ្នាំយើងលេបហួសកម្រិតអីអ៊ីចេះ អ៊ីចុះគឺអត់មានទេ»។
ចំពោះសំណួរថា តើទឹកប្រភេទណាទើបយកមកទទួលទានដើម្បីព្យាបាលរោគបាន? លោក ចាន់ សារុំ អធិប្បាយដូច្នេះ ៖ «ទឹកដែលយើងហូបហ្នឹង ទី១ គឺយើងបើកពីរ៉ូប៊ីណេមកផ្ទាល់ កុំឲ្យថាយើងបើកពីរ៉ូប៊ីណេ កុំឲ្យថា ដាក់ពាង ដាក់ធុង ដាក់អាងអីអាហ្នឹងខ្ញុំមិនហ៊ាននិយាយទេ បើថាបើកពីរ៉ូប៊ីណេហើយ យើងយកដបទៅត្រងហើយ យើងបិទគម្របទុក ព្រលឹមឡើងយើងផឹកល្អ មានប្រសិទ្ធភាព ហើយបើដូចនៅតាមជនបទអីទឹកយើងដាំ ជនបទវាអត់មានទឹកម៉ាស៊ីនប្រើបានល្អ យើងដាំទៅ ច្រកដបទុកដូចគ្នា។ ហើយឪក្មេកខ្ញុំនិយាយជាក់ស្ដែងគាត់ឡើងឈាម ១០ឆ្នាំហើយ គាត់ទៅពេទ្យនៅពិភពក្រុង ហើយកាត់កើតឫសដូងបាតហ្នឹង ចូលម្ភៃឆ្នាំ ឥឡូវឫសដូងបាតគាត់រួញចង់អស់ហើយ ហើយថ្ងៃមុនខ្ញុំទៅគាត់ ដូចឃើញគាត់សប្បាយរីករាយ ហើយពីមុនឡើងឈាមថ្នាក់ហ៊ឹងស្លឹកត្រចៀក ឥឡូវត្រចៀកគាត់ក៏និយាយស្ដាប់បានគួរសមរបស់គាត់វិញ ដល់ ៧០%»។
មិត្តអ្នកស្តាប់ខ្លះ ព្រមានថា គប្បីកុំទទួលទានទឹកច្រើនហួសពេក ព្រោះអាចបណ្តាលឲ្យមានគ្រោះថ្នាក់បាន គឺអាចពុលទឹក ដែលភាសាពេទ្យហៅថា Hyponatremia ឬ Water intoxication ដែលច្រើនកើតនឹងអ្នកកីឡាប្រភេទរត់ម៉ារ៉ាតុង គឺថា កាលណាបែកញើសច្រើនរាងកាយខ្វះទឹកខ្វះសារធាតុអំបិល អាចធ្វើឲ្យចង់ផឹកទឹកក្នុងបរិមាណច្រើនហួសហេតុក្នុងរយៈពេលខ្លី ការនេះធ្លាប់មានមនុស្សមានគ្រោះថ្នាក់រហូតដល់បាត់បង់ជីវិតច្រើនករណីមកហើយ។
ចំពោះរឿងផឹកទឹកច្រើនហួសពេកនេះ លោកវេជ្ជបណ្ឌិត Batmanghelidj ដែលជាគ្រូពេទ្យនៅសហរដ្ឋអាមេរិក នាំមុខគេខាងជំរុញឲ្យទទួលទានទឹកដើម្បីព្យាបាលរោគ បានមានប្រសាសន៍ក្នុងនាទីទូរទស្សន៍មួយ កាលពីមុន លោកទទួលអនិច្ចកម្មនៅឆ្នាំ២០០៤ ថា ៖ «ខ្ញុំពុំបាននិយាយថា ទឹកគឺជាអ្វីដែលលោកអ្នកគប្បីទទួលទានឲ្យច្រើនហួសហេតុនោះទេ ព្រោះវានឹងទៅបន្សាបសារធាតុរ៉ែក្នុងខ្លួនមនុស្សអស់ ដូច្នេះចាំបាច់ត្រូវតែទទួលទានធាតុរ៉ែបន្ថែមដើម្បីយកទៅជំនួសធាតុរ៉ែ ដែលត្រូវលាងបញ្ចេញមកក្រៅនេះ បើសិនជាគេប្រាថ្នាចង់មានសុខភាពល្អ»។
សូមជម្រាបថា សារធាតុរ៉ែមានច្រើនយ៉ាងណាស់ដែលរាងកាយមនុស្សចាំបាច់ត្រូវមានតែដែលសំខាន់គឺប៉ូតាស្យូម និងសូឌីយ៉ូម ឬ សារធាតុអំបិល។ ដូច្នេះហើយទើបចលនា Water cure របស់លោកវេជ្ជបណ្ឌិត Batmanghelidj ណែនាំឲ្យសមាជិកទទួលទានចេកនិងបន្លែផ្លែឈើដទៃទៀតដែលមានធាតុប៉ូតាស្យូម ហើយឲ្យលាយអំបិលក្នុងទឹកបន្តិចផង។
លោក បប់ បាត់ នៃទីក្រុងឈីកាហ្គោ (Chicago) ដែលជាអ្នគាំទ្រវិធី Water Cure របស់លោកវេជ្ជបណ្ឌិត Batmanghelidj មានប្រសាសន៍ថា ត្រូវលាយអំបិលក្នុងទឹកដែលទទួលទាននោះ គឺប្រើអំបិលមួយភាគបួននៃកូនស្លាបព្រាកាហ្វេសម្រាប់ទឹកមួយលីត្រ៕