លោក ហ៊ុន សែន ប្រធានគណបក្សប្រជាជនកម្ពុជា ប្រាប់ទៅគណបក្សសម្ព័ន្ធមិត្តនឹងគណបក្សរបស់លោកទាំង២៧ ឱ្យត្រៀមខ្លួនកម្ចាត់អ្នកនយោបាយមួយក្រុម ដែលលោកចោទប្រកាន់ថា ជាក្រុមជ្រុលនិយម។
បើទោះជាសាររបស់លោក ហ៊ុន សែន មិនបញ្ចេញឈ្មោះអ្នកនយោបាយរូបណា ឬក្រុមណាក្ដី ប៉ុន្តែ មន្ត្រីជាន់ខ្ពស់គណបក្សប្រឆាំងថ្លែងថា លោក ហ៊ុន សែន ទំនងចង់សំដៅលើមេដឹកនាំនយោបាយ និងសកម្មជនគណបក្សសង្គ្រោះជាតិ និងសកម្មជនគណបក្សភ្លើងទៀន ដែលលោកព្យាយាមតាមកម្ចាត់ឫសគល់គណបក្សប្រឆាំង ដើម្បីរក្សាអំណាចរបស់គណបក្សប្រជាជនកម្ពុជា។ មនុស្សដែលលោក ហ៊ុន សែន ចង់សំដៅ ទំនងជាគ្មាននរណាក្រៅពីលោក សម រង្ស៊ី ប្រធានស្ដីទីគណបក្សសង្គ្រោះជាតិ និងបក្ខពួកលោកឡើយ ដ្បិតអីមេដឹកនាំបក្សកាន់អំណាចរូបនេះនៅតែចិញ្ចឹមចិត្តចោទប្រកាន់ចលនាវិលចូលស្រុក ៩វិច្ឆិកា របស់លោក សម រង្ស៊ី ថា ជាទម្រង់នៃការផ្ដួលរំលំរដ្ឋាភិបាល បំផ្លាញសន្តិភាព ហើយសំណុំរឿងនេះ នៅក្នុងការកាត់ក្ដីរបស់តុលាការ។
លោក ហ៊ុន សែន ទាមទារបែបនេះ នៅក្នុងជំនួបរវាងគណបក្សប្រជាជនកម្ពុជានិងគណបក្សសម្ពន្ធភាពរបស់ខ្លួនចំនួន២៧ កាលពីថ្ងៃទី២៥ តុលា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។