តំណាងប្រជាពលរដ្ឋ ១.៥០០ គ្រួសារ លោក ដួង គា អាយុ ៤៣ ឆ្នាំ ថ្លែងថា ប្រជាពលរដ្ឋសុំឲ្យសាលាក្រុងភ្នំពេញ ដោះស្រាយ និងវាស់វែងដីចែកជូនប្រជាពលរដ្ឋឲ្យបានត្រឹមត្រូវ ដោយមានការចូលរួមពីប្រជាពលរដ្ឋផង។
លោកបន្តថា ៖ «អភិវឌ្ឍន៍នៅនឹងកន្លែង ដោយមានទំហំផ្ទះ ៤ ម៉ែត្រ គុណ ១៦ ម៉ែត្រ។ ផ្ទាល់ដី មានកម្មសិទ្ធិត្រឹមត្រូវ និងធានាថា ការសាងសង់បន្តនៅថ្ងៃអនាគត ដូចជា យើងមានកូនមានចៅអាចធ្វើឡើងទៅលើបានតទៅទៀត។ ទាមទារដូចជាខ្ញុំ នៅតំបន់បឹងកក់ចំនួន ៧ ភូមិនេះ មានទាំងអស់ ១.៥០០ គ្រួសារ ដែលគាត់មិនព្រមចាកចេញទេ។ ហើយតែងតែអំពាវនាវសុំឲ្យរដ្ឋាភិបាលមេត្តា ជួយសម្រួលក្នុងករណីដែលមានភាពងាយស្រួលអភិវឌ្ឍន៍នៅនឹងកន្លែង ឲ្យបានឆាប់រហ័ស»។
កន្លងមក មានប្រជាពលរដ្ឋសរុបចំនួន ៤.២៥២ គ្រួសារនៅបឹងកក់នោះ។ ប៉ុន្តែ ប្រជាពលរដ្ឋជាង ២.៧០០ គ្រួសារ ត្រូវបានសាលាក្រុងភ្នំពេញ និងក្រុមហ៊ុន ស៊ូកាគូ តម្រូវឲ្យចាកចេញពីតំបន់បឹងកក់ នោះដោយបង្ខំ។
សាលាក្រុងភ្នំពេញ បានផ្ដល់អាជ្ញាប័ណ្ណឲ្យក្រុមហ៊ុន ស៊ូកាគូ អភិវឌ្ឍន៍នៅតំបន់បឹងកក់នោះ ទំហំ ១៣៣ ហិកតារសម្រាប់រយៈពេល ៩៩ ឆ្នាំ ក្នុងទឹកប្រាក់ចំនួនជាង ៧៩ លានដុល្លារអាមេរិក។
កិច្ចសន្យានេះ ត្រូវបានចុះហត្ថលេខារវាងអភិបាលក្រុងភ្នំពេញ លោក កែប ជុតិមា និងលោកឧកញ៉ា ទ្បៅ ម៉េងឃីន កាលពីខែកុម្ភៈ ឆ្នាំ ២០០៧។
ចាប់តាំងពីពេលនោះមក ប្រជាពលរដ្ឋដែលមិនព្រមចាកចេញ បានងើបតវ៉ាជាច្រើនលើក។ ក៏ប៉ុន្តែ ការតវ៉ារបស់ពលរដ្ឋទាំងនោះ ត្រូវបានអាជ្ញាធរបង្ក្រាបដោយហិង្សា បណ្ដាលឲ្យមានអ្នករងរបួស និងរងការចាប់ខ្លួន៕