កម្ពុជាថាទីភ្នាក់ងារស៊ើបការណ៍ថៃកំពុងធ្វើឲ្យខូចខាតដល់ទំនាក់ទំនងខ្មែរ-ថៃ
ក្រសួងការបរទេសកម្ពុជា បានផ្ញើលិខិតទៅកាន់ស្ថានទូតថៃប្រចាំទីក្រុងភ្នំពេញ នៅថ្ងៃ១៣ តុលា បដិសេធយ៉ាងដាច់អហង្ការទៅនឹងការចោទប្រកាន់របស់នាយកដ្ឋានស៊ើបការណ៍សម្ងាត់របស់ថៃ ដែលបានចុះតាមសារព័ត៌មានថៃថា កម្ពុជាបានអនុញ្ញាតឲ្យមានការហ្វឹកហ្វឺនប្រដាប់អាវុធនៅលើដែនដីរបស់ខ្លួនដល់សមាជិកក្រុមអាវក្រហម ដើម្បីធ្វើសកម្មភាពភេរវកម្មប្រឆាំងរដ្ឋាភិបាលថៃ និងរៀបគម្រោងធ្វើឃាតមន្ត្រីជាន់ខ្ពស់របស់រដ្ឋាភិបាលថៃ។
ដោយ តាំង សារ៉ាដា
លិខិតរបស់ក្រសួងការបរទេសកម្ពុជា បានព្រមានថា ការអះអាងដោយមួលបង្កាច់ និងគ្មានភស្តុតាងរបស់ទីភ្នាក់ងារស៊ើបការណ៍ពិសេសរបស់ថៃនេះ កំពុងធ្វើឲ្យប៉ះពាល់យ៉ាងធ្ងន់ធ្ងរដល់ទំនាក់ទំនងកម្ពុជា-ថៃ ហើយក៏អាចជាឧបសគ្គរារាំងដល់កិច្ចខិតខំប្រឹងប្រែង ដើម្បីធ្វើឲ្យប្រសើរឡើងវិញនូវទំនាក់ទំនងនៃប្រទេសទាំងពីរផងដែរ៕
