សិក្ខាសាលារយៈពេល ២ថ្ងៃនោះ ក៏មានការចូលរួមពីប្រទេសភូមា ឡាវ ផងដែរ ដោយមានការឧបត្ថម្ភផ្នែកបច្ចេកទេសពីក្រុមសាស្ត្រាចារ្យមកពីប្រទេសអូស្ត្រាលី។
លោក ថោង ខុន រដ្ឋមន្ត្រីក្រសួងទេសចរណ៍កម្ពុជា បានថ្លែងក្នុងការបើកសិក្ខាសាលានោះ កាលពីព្រឹកថ្ងៃច័ន្ទ ទី៦ មិថុនា ថា កម្ពុជាកំពុងសម្លឹងឃើញវិស័យអេកូទេសចរណ៍ ដែលជាផ្នែកសំខាន់បំផុត ក្នុងការជួយបង្កើតការងារ និងផ្ដល់កម្រៃឱ្យប្រជាពលរដ្ឋដែលរស់នៅតាមទីជនបទ។
លោក ថោង ខុន បានឱ្យដឹងថា នៅប្រទេសកម្ពុជា បានរកឃើញខេត្តចំនួន ១៤ នៅតាមតំបន់ភាគឦសាន តំបន់ឈូងសមុទ្រ និងខ្លះទៀតនៅជុំវិញតំបន់បឹងទន្លេសាប ដែលតំបន់ទាំងនោះមានធម្មជាតិចម្រុះស្រស់ស្អាត ហើយអាចទាក់ទាញអ្នកទេសចរណ៍ឱ្យចង់ទស្សនា។
លោកស្រី ផេន្នី រីឆាដស៍ (Penny Richards) ឯកអគ្គរដ្ឋទូតរបស់ប្រទេសអូស្ត្រាលីប្រចាំនៅកម្ពុជា បានមានប្រសាសន៍ថា វិស័យទេសចរណ៍គឺជាវិស័យសំខាន់បំផុតសម្រាប់ប្រទេសទាំងពីរ គឺអូស្ត្រាលី និងកម្ពុជា ហើយជាពិសេសសម្រាប់ប្រទេសជិតខាងនៅក្នុងតំបន់ផងដែរ។ ម្យ៉ាងវិញទៀត ប្រទេសអូស្ត្រាលី មានការប្ដេជ្ញាចិត្តយ៉ាងខ្លាំងដើម្បីលើកតម្កើងវិស័យទេសចរណ៍នៅក្នុងប្រទេសកម្ពុជា ក៏ដូចជានៅក្នុងតំបន់អាស៊ីអាគ្នេយ៍នេះផងដែរ៕