អង្គការ​ក្រៅ​រដ្ឋាភិបាល​មួយ​បង្កើត​សមាគម​កម្មករ​ចំណាក​ស្រុក

អង្គការ​ក្រៅ​រដ្ឋាភិបាល​មួយ​បាន​រៀបចំ​សមាគម​សម្រាប់​ការពារ​អ្នក​ចំណាក​ស្រុក ដើម្បី​ជៀសវាង​ពី​បញ្ហា​ទាំង​ឡាយ​ដែល​កើត​មាន​មក​លើ​កម្មករ។
ដោយ ទីន ហ្សាការីយ៉ា
2010-12-28
អ៊ីម៉ែល
មតិ
Share
បោះពុម្ព

មជ្ឈមណ្ឌល​អាមេរិកាំង​សម្រាប់​សាមគ្គីភាព​ការងារ​អន្តរជាតិ នៅ​ថ្ងៃ​ទី​២៨ ខែ​ធ្នូ បាន​បើក​កិច្ចប្រជុំ​មួយ​នៅ​ក្នុង​ខែត្រ​កោះកុង ក្នុង​ការ​​បង្កើត​សមាគម​កម្មករ​ចំណាក​ស្រុក​កម្ពុជា (Cambodian Migrant Workers Association) ប្រចាំ​នៅ​ខែត្រ​កោះកុង និង​នៅ​ក្រុង​ប៉ោយប៉ែត ខែត្រ​បន្ទាយមានជ័យ ដើម្បី​ការពារ​ផលប្រយោជន៍​របស់​កម្មករ​ចំណាក​ស្រុក។

លោក ដេវីដ ចនវេលស៍ (David John Welsh) ប្រធាន​មជ្ឈមណ្ឌល​អាមេរិកាំង សម្រាប់​សាមគ្គីភាព​ការងារ​អន្តរជាតិ ហៅ​ថា ACILS (American Center for International Labor Solidarity) បាន​ឲ្យ​ដឹង​តាម​ទូរស័ព្ទ​ពី​ខែត្រ​កោះកុង មក​ថា កម្មករ​ចំណាក​ស្រុក​មិន​មាន​សមាគម​សម្រាប់​រួប​រួម​គ្នា​ជា​កម្លាំង​ទេ ដូច្នេះ​ដើម្បី​ឱ្យ​កម្មករ​រួប​រួម​គ្នា​ជា​កម្លាំង និង​តាម​សិទ្ធិ​ដែល​គេ​មាន វា​គួរ​តែ​មាន​អង្គការ​របស់​កម្មករ ហើយ​ការងារ​ជា​ច្រើន​ដែល​កម្មករ​ធ្វើ​នោះ គឺ​នៅ​កន្លែង​ក្រៅ​ផ្លូវការ ជា​ទូទៅ​គេ​មិន​អនុញ្ញាត​ឱ្យ​ចូល​រួម​ជា​សហជីព​ទេ​នៅ​ក្នុង​ប្រទេស​ដែល​ទទួល​យក​កម្មករ។

លោក ដេវីដ ចនវេលស៍ បន្ត​ថា ៖ "ទូត​កម្ពុជា មិន​មាន​តំណាង​មន្ត្រី​ទទួល​បន្ទុក​ការងារ​មើល​ការ​ខុស​ត្រូវ​កម្មករ​ទេ ហើយ​ប្រាក់​ឈ្នួល​រ​របស់​គេ​ក៏​មិន​មាន​ការ​ធានា គេ​មិន​អាច​ចរចា​មក​ខាង​កម្ពុជា​បាន ថា​តើ​គេ​ត្រូវ​បាន​ប្រាក់​ឈ្នួល​ប៉ុន្មាន គឺ​គេ​មិន​មាន​ការ​ការពារ​អ្វី​សោះ។ ដូច្នេះ​សមាគម​នេះ​នឹង​មើល​ការ​ខុស​ត្រូវ​ផលប្រយោជន៍​កម្មករ"

លោក ដេវីដ ចនវេលស៍ បន្ថែម​ថា ការ​បង្កើត​សមាគម​នេះ​ក៏​ដើម្បី​ភ្ជាប់​ទំនាក់ទំនង​ប្រទេស​ដែល​ទទួល​កម្មករ ដូច្នេះ​កម្មករ​ដែល​ធ្វើការ​នៅ​ម៉ាឡេស៊ី ថៃ ឬ​ប្រទេស​ណា​ក៏ដោយ ក៏​អាច​ជា​សមាជិក​បាន​ដែរ។ ដូច្នេះ​ក្រុម​នេះ​នឹង​ជា​ក្រុម​បង្ហាត់​បង្រៀន ក្រុម​ផ្ដល់​ជំនួយ​ខាង​ផ្លូវ​ច្បាប់ ហើយ​នៅ​ពេល​អនាគត​នឹង​ជា​ក្រុម​ដែល​ត្រូវ​ចរចា​ជាមួយ​និយោជក ឬ​ក្រុមហ៊ុន​ជ្រើសរើស​កម្មករ ដើម្បី​ធានា​ដល់​ការ​គោរព​សិទ្ធិ​កម្មករ គោរព​កិច្ចសន្យា ផ្ដល់​ការ​ហ្វឹកហ្វឺន​ដល់​កម្មករ​មុន​ចាក​ចេញ​ពី​ប្រទេស​កម្ពុជា។

លោក​សង្ឃឹម​ថា នៅ​ពេល​អនាគត​សមាគម​នេះ​នឹង​អាច​ជា​ក្លាយ​ជា​សមាជិក​បណ្ដាញ​មួយ​របស់​សមាគម​កម្មករ​ចំណាក​ស្រុក​នៅ​ប្រទេស​ថៃ និង​ម៉ាឡេស៊ី។

អនុ​ប្រធាន​មន្ទីរ​កិច្ចការ​នារី​ខែត្រ​កោះកុង លោកស្រី ឡុក សុម៉ានេត បាន​មាន​ប្រសាសន៍​ថា នេះ​ជា​ការ​ល្អ​មួយ​ក្នុង​ការ​បង្កើត​សមាគម​នេះ ពីព្រោះ​ថា កម្ពុជា​ជា​ប្រទេស​ដែល​មាន​កម្មករ​ធ្វើការ​ចំណាក​ស្រុក​ច្រើន ទាំង​ស្រប​ច្បាប់ និង​មិន​ស្រប​ច្បាប់។

លោកស្រី ឡុក សុម៉ានេត បាន​លើក​ឡើង​ថា នៅ​ក្នុង​ខែត្រ​កោះកុង មិន​សូវ​មាន​កម្មករ​ចំណាក​ស្រុក​ច្រើន​ទេ ប៉ុន្តែ​មាន​កម្មករ​មក​ពី​ខែត្រ​ផ្សេងៗ​នៅ​ក្នុង​ប្រទេស​កម្ពុជា បាន​ធ្វើការ​ចំណាក​ស្រុក​មិន​ស្រប​ច្បាប់​ទាំង​ប្រថុយប្រថាន​តាម​ច្រក​អន្តរជាតិ​ខែត្រ​កោះកុង ដូច​ជា​ទៅ​ប្រទេស​ថៃ ម៉ាឡេស៊ី។ លោកស្រី​បញ្ជាក់​ថា សមត្ថកិច្ច​ថៃ បាន​បញ្ជូន​កម្មករ​ខ្មែរ​យក​មក​ដាក់​នៅ​ខែត្រ​កោះកុង ចន្លោះ​ពី​ជាង ៤០០​នាក់​ទៅ ៥០០​នាក់​ក្នុង​មួយ​ឆ្នាំៗ។

អនុ​ប្រធាន​នាយកដ្ឋាន​ការងារ​នៃ​ក្រសួង​ការងារ លោក ហ៊ូ វុទ្ធី បាន​ឲ្យ​ដឹង​កាល​ពី​ថ្ងៃ​ទី​១៨ ខែ​ធ្នូ​ថា កម្មករ​ខ្មែរ​ដែល​ធ្វើការ​ចំណាក​ស្រុក​កន្លង​មក គឺ​ទៅ​ប្រទេស​ថៃ ម៉ាឡេស៊ី ជប៉ុន កូរ៉េខាងត្បូង និង​ប្រទេស​អារ៉ាប់។

មន្ត្រី​ដដែល​បញ្ជាក់​ថា ការ​ធ្វើ​ចំណាក​ស្រុក​មាន​សុវត្ថិភាព ត្រូវ​តែ​ធ្វើ​ឡើង​តាម​រយៈ​ក្រសួង​ការងារ និង​ក្រុមហ៊ុន​មួយ​ចំនួន ដែល​ក្រសួង​ការងារ​ទទួល​ស្គាល់​ប៉ុណ្ណោះ ដូចជា​ការ​ចាកចេញ​ទៅ​ប្រទេស​កូរ៉េ និង​ប្រទេស​ម៉ាឡេស៊ី។ ប៉ុន្តែ​យ៉ាង​នេះ​ក្តី ក៏​គេ​នៅ​តែ​ឃើញ​មាន​ការ​ធ្វើ​ចំណាក​ស្រុក​មិន​ស្រប​ច្បាប់​តាម​រយៈ​ការ​លួងលោម​របស់​មេ​ខ្យល់ ដែល​ជា​ការ​គ្រោះថ្នាក់​សម្រាប់​កម្មករ៕

ព័ត៌មាន (0)
Share
គេហទំព័រ​ទាំងមូល